Qashaǵannan 2014 jyly óndiriletin munaı kólemine qatysty boljam qaıta qaralmaq

ASTANA. 13 jeltoqsan. QazAqparat - Qashaǵannan 2014 jyly óndiriletin munaı kólemine qatysty naqty boljam birneshe aıdan keıin belgili bolýy múmkin. Bul týraly Halyqtyq IPO baǵdarlamasynyń resmı saıty habarlady.

QR Munaı jáne gaz mınıstri Uzaqbaı Qarabalınniń aıtýynsha, bul kenishtegi qubyr jelilerin zertteý nátıjesine baılanysty. Ol 2013 jyldyń aıaǵy men 2014 jyldyń basynda aıaqtalmaq.
«Biz basynda 2014 jyly 8 mln. tonna munaı óndirýdi josparlaǵan edik. Endi qandaı jumys jasalatynyna ári uzaqtyǵyna baılanysty josparlaıtyn bolamyz», - dedi mınıstr Úkimet otyrysynan keıin tilshilerge bergen jaýabynda.
Qashaǵan munaıy bıyl 11 qyrkúıekte óndirile bastady. Alaıda, qubyrdaǵy apatqa baılanysty 24 qyrkúıekte jáne 9 qazanda toqtap qaldy. Kezekti jóndeýden keıin, muqııat baqylaýmen gıdrosynaq júrgizildi, onyń barysynda gaz shyǵatyn basqa da qubyrlar anyqtaldy. Qara altyn óndirý toqtatylyp, zertteý bastaldy.
Buǵan deıin Qashaǵan munaıynyń bir bóligi eksportqa «QazTransOıl» AQ tıesili munaı qubyrlary arqyly shyǵarylatyny habarlanǵan bolatyn. Kompanııa «Halyqtyq IPO» baǵdarlamasynyń debıýtanty, onyń aktsııalary Qazaqstan qor bırjasynda satylady.