Qashaǵandaǵy uńǵymalar 10 kúnnen keıin ashylady - Qanat Bozymbaev
«Qashaǵan eń úlken ken ornynyń biri ekeni belgili. Sondyqtan ony iske qosý mańyzdy másele dep bilemin. Búginde ken ornynyń iske qosylýy taqyryby tóńireginde ınternet jelisinde jáne ózge alańdarda mamandar men sarapshylar qyzý talqylap jatyr. Atap aıtqanda, 10 kúnnen keıin uńǵymalardy ashamyz dep josparlap otyrmyz. Alaıda, uńǵymalardy ashsaq ta, Qashaǵan iske qosyldy dep tolyqtaı aıtýǵa bolmaıdy. Óıtkeni, ken ornynda tek uńǵymalar ǵana emes, sonymen qatar eki úlken zaýyt bar. Bireýi munaıdy tazalaıdy, al ekinshisi - gazdy tazartýdan ótkizedi. Sol zaýyttar 7-8 jyl buryn salynǵan bolatyn, osy rette merdigerler bul nysandardy tekserip shyqty»,-dedi mınıstr.
Q. Bozymbaevtyń sózine qaraǵanda, 10 kúnnen keıin uńǵymalar ashylady, sodan keıin 4 apta boıy eki zaýyt munaı men gazdy tazalaıdy.
«Sol ýaqytta zaýyttardyń jumysyn qadaǵalaımyz. Osy rette taza munaı men qurǵaq gaz tıisti kólemde shyqqannan soń, Qashaǵandy iske qostyq dep aıtýǵa bolady. Sondyqtan bir jarym aıdan keıin, ıaǵnı qazannyń aıaǵy men qarashanyń basynda iske qosylady dep josparlap otyrmyz»,-dep túıindedi sózin Energetıka mınıstri.