Qashaǵanda táýligine 500 myń tonna barrel munaı óndirilmek

NUR-SULTAN. QazAqparat - Qashaǵandaǵy munaı óndirý kólemi táýligine 500 myń tonna barrelge jetkizilýi múmkin. Bul týraly búgin Úkimet úıindegi baspasóz máslıhatynda QR Energetıka birinshi vıtse-mınıstri Mahambet Dosmuhambetov aıtty, dep habarlaıdy QazAqparat tilshisi.

«Búgingi kúni Qashaǵan tájirıbelik-óndiristik ázirleme aıasynda ıgerilip jatyr. Muny birinshi fazasy desek te bolady. Qazirgi ýaqytta táýligine 380 myń barrel munaı óndiriledi. Dál osy faza aıasynda kezeń-kezeńimen táýligine 420 myńnan 500 myń barrelge deıin jetkizý josparlanǵan. Biraq, bul tek birinshi fazada ǵana. Sóz ken ornyn barynsha qamtý arqyly Qashaǵandy tolyq aýqymda ıgerý jaıynda bolyp otyr. Árıne, bul jańa araldar salý, jańa óndirisishilik qural-jabdyqtar men uńǵymalardy burǵylaýǵa oraı úlken shyǵystarmen baılanysty jáne konsortsıým túrli nusqalaryn qarastyryp jatyr», - dedi birinshi vıtse-mınıstr.

Osy oraıda ol Qashaǵandy tolyqqandy ıgerý úshin «Bolashaq» gazdy qaıta óńdeý zaýytynyń qýaty jetispeıtindigin aıtty.

«Birinshi faza aıasynyń ózinde óndirilgen ilespe gaz kólemin kádege jaratý munaı óndirýdi arttyrýǵa kedergi keltiretin faktor bolyp tur. Al »Bolashaq« zaýyty óziniń qujattyq qýatyna sáıkes tehnıkalyq turǵyda ony eńsere almaıdy. Sondyqtan da boljammen jylyna 1 mlrd tekshe metrlik óndiristik qýaty bolǵanymen odan keıin eseleı túsýge múmkindigi bar modýldik turǵyda gazdy qaıta óńdeıtin zaýyt salý nusqasy qarastyrylýda», - dedi ol.

Sonymen qatar ol bul máseleniń ázirshe tehnıkalyq turǵyda qarastyrylyp jatqandyǵyn eskertti.

«Árıne, bári jobanyń quny men qarjylandyrý máselesi baılanysty bolyp otyr. Másele ázirshe talqylanyp jatyr. Menińshe, gazdy kádege jaratýdaǵy kedergilerdi joıý, ony qaıta óńdeý jáne soǵan oraı munaı óndirý kólemin arttyrý úshin bul eń durys sheshim bolmaq. Bul respýblıkaǵa gazdyń qosymsha kólemin de berer edi», - dedi Mahambet Dosmuhambetov.