«Qashaǵanda» shıki gazdy kóp jaqqan kompanııadan 3,5 mlrd teńge zalal óndiriledi

<p>ATYRAÝ. KAZINFORM &ndash; Kaspıı teńizindegi &laquo;Qashaǵan&raquo; ken ornyn ıgerip jatqan NCOC kompanııasynyń fılıalynan 3,5 mlrd teńge zalal óndiriledi. Buǵan ken ornynda shıki gaz normadan tys jaǵylǵany sebep bolǵan.</p>

Astana qalasynyń mamandandyrylǵan aýdanaralyq ekonomıkalyq sotynda Energetıka mınıstrligi Munaı-gaz keshenindegi memlekettik ınspektsııasy Batys óńiraralyq basqarmasynyń «Nort Kaspıan Opereıtıng Kompanı N.V.» fılıalyna memleketke keltirilgen zııandy óndirý týraly talaby qaraldy.

Sot talqylaýynda Energetıka mınıstrligi jaýapkerdiń munaı-gaz keshenindegi qyzmetine keshendi tekserý júrgizgeni anyqtalǵan. Tekserý qorytyndysyna sáıkes «Qashaǵan» ken ornynda kómirsýtekter men kómirsýtekti emes gazdardyń kópkomponentti qospasy shekten tys ruqsatsyz jaǵylǵan. Osyǵan baılanysty ákimshilik quqyq buzýshylyq týraly hattama toltyrylǵan

– «Nort Kaspıan Opereıtıng Kompanı N.V.» fılıaly QR Ákimshilik quqyq buzýshylyq týraly kodeksiniń 356-babynyń 3, 5-bóliginde (Jer qoınaýyn paıdalaný jónindegi operatsııalardy júrgizý qaǵıdalaryn buzý) kózdelgen quqyq buzýshylyqty jasaǵany úshin kináli dep tanyldy. Atyraý oblystyq sotynyń qylmystyq ister jónindegi sot alqasynyń 2024 jylǵy 28 mamyrdaǵy qaýlysymen fılıaldyń shaǵymy qanaǵattandyrýsyz, ákimshilik jaza qoldaný týraly qaýly ózgerissiz qaldyryldy. Osylaısha, «Qashaǵan» ken ornynda shıki gazdy shekten tys jaǵý faktisi anyqtaldy, -dep habarlady elordalyq sottan.

Elimizde jer qoınaýyn utymdy jáne keshendi paıdalaný jónindegi talaptardy buzý nátıjesinde keltirilgen zalaldyń mólsheri memleketke keltirilgen zalaldyń ádil ótelýin qamtamasyz etýge baǵyttalǵan erejeler bar. Al kómirsýtekterdi barlaý jáne óndirý kezinde jer qoınaýyn utymdy jáne keshendi paıdalaný jónindegi talaptardy buzý nátıjesinde keltirilgen zalaldyń mólsheri qaǵıdalarmen aıqyndalǵan.

– Zańda jer qoınaýyn paıdalanýshynyń jer qoınaýy jáne jer qoınaýyn paıdalaný týraly zańnamanyń talaptaryn buzý nemese jer qoınaýyna memlekettik menshik quqyǵy saldarynan keltirilgen zııandy óteý mindeti kózdelgen. Sot osyny eskerip, ýákiletti memlekettik organnyń talap qoıýyn qanaǵattandyrdy, -dep málim etti sottan.

Sot sheshimi zańdy kúshine engen joq.

Eske sala ketelik, buǵan deıin Atyraý ekologteri byltyr tabıǵatty búldirgenderge 44,8 mlrd aıyppul salǵanyn jazǵan edik.