Qashaǵan operatoryna $5,1 mlrd aıyppul salynýy múmkin

ASTANA. QazAqparat – Mınıstrlik North Caspian Operating Company kompanııasyn ekologııalyq talaptardy buzǵany úshin aıyppul salýdy talap etip, sotqa júgindi. Aıyppul kólemin sot anyqtaıdy, dep habarlaıdy QazAqparat tilshisi.

Ekologııa jáne tabıǵı resýrstar mınıstrliginiń baspasóz qyzmeti Qashaǵan munaı ken ornynyń operatory North Caspian Operating Company kompanııasyn ekologııalyq buzýshylyqtar úshin jaýapkershilikke tartýdy talap etip sotqa júgingenin rastady.

«Aıyppul somasyn sot aıqyndaýǵa tıis», - delindi vedomstvodan.

Sondaı-aq, sot otyrysynyń kúni áli naqtylanbaǵany aıtyldy. Mınıstrliktiń sotqa júginýine ken ornynda kúkirttiń kóp mólsherde saqtaý faktisi sebep bolyp otyr.

Buǵan deıin Bloomberg basylymy QR Ekologııa jáne tabıǵı resýrstar mınıstrligi North Caspian Operating Company kompanııasyn ekologııalyq talaptardy buzǵany úshin $5,1 mlrd kóleminde aıyppul salýdy talap etip, sotqa júgingenin habarlaǵan edi.

Eske salsaq, 6 naýryzda kúkirtti zańsyz saqtaý faktisi boıynsha Atyraý oblysy boıynsha ekologııa departamenti North Caspian Operating Company kompanııasynyń qyzmetine tekserý júrgizdi.

Tekserý barysynda ekologııalyq zańnamany buzý faktileri anyqtaldy:

- 1 mln tonnadan astam kólemde «Bolashaq» MKQK qoımalaý alańdarynda kúkirtti normatıvten tys ornalastyrýdy júzege asyrady;

- kelisilgen jobalyq qujattarsyz jáne ekologııalyq ruqsatsyz paıdalanylǵan siltini qalpyna keltirý úshin kúkirt qyshqylyn saqtaýdyń ýaqytsha alańy paıdalanylady;

- qorshaǵan ortany qorǵaý jónindegi is sharalar jospary tolyq kólemde oryndalmaıdy;

- tıisti tazartýsyz aǵyndy sýlardy býlandyrǵysh toǵanǵa aǵyzý júzege asyrylady;

- memlekettik ekologııalyq saraptama qorytyndysynda kózdelgen talaptardy oryndamady;

- qorshaǵan ortany qorǵaý salasyndaǵy ýákiletti organnyń kelisiminsiz shlam aýlaǵyshty qaıta beıindeý júzege asyryldy;

- tazartylmaǵan shıki gazdy alaýlarda ekologııalyq ruqsatsyz jaǵý júzege asyryldy;

- ruqsat qujattary joq tkjo obektisiniń býlaný syıymdylyqtarynda óz betinshe emıssııalar júzege asyryldy.

«Joǵaryda kórsetilgen faktiler boıynsha kompanııaǵa qatysty QR ÁQBtK 324-babynyń 1-bóligi, 325-babynyń 1-bóligi, 326-babynyń 1-bóligi, 328-babynyń 1-bóligi, 331-babynyń 3-bóligi, 332-babynyń 2-bóligi boıynsha ákimshilik is qozǵaldy. Qazirgi ýaqytta kompanııanyń kelip túsken ótinishhaty negizinde qozǵalǵan materıaldar Atyraý qalasynyń ákimshilik sotynda qaralýda. Sot talqylaýynyń nátıjeleri qosymsha jarııalanatyn bolady», - delingen habarlamada.