Qashaǵan munaıy sarqyla bastaǵan ken oryndardyń qoryn toltyrdy
«2016 jyly Qazaqstanda munaı óndirý úshinshi jyl qatarynan tómendegen bolatyn, onyń 2014 jyly kólemi 1,2 paıyzǵa, 2015 jyly 1,6 paıyzǵa jáne 2016 jyly 1,9 paıyzǵa, ıaǵnı jalpy 78 mln tonna deńgeıine deıin qysqardy. Ken qorlarynyń tómendeýi negizinen Aqtóbe jáne Qyzylorda oblystaryndaǵy óndirý kólemi azaıǵan ken oryndaryna tıesili boldy. Alaıda 2016 jyldyń sońynan beri Qashaǵan ken ornynda óndirý kóleminiń ósýine baılanysty osy salada birshama ózgerister oryn aldy. Sondyqtan eldegi óndirýdiń jıyntyq kólemi ósim traektorııasyna órledi», - dep atap ótilgen KAZENERGY qaýymdastyǵy úshin IHS Markit kompanııasy daıarlaǵan baıandamanyń «Shıki munaı men gaz kondensatyn óndirý» atty bóliminde.
Degenmen de 2017 jyly Qazaqstanda munaı óndirý kólemi belgili bir jasalǵan ýaǵdalastyq aıasynda maqsatty túrde shektelgen bolatyn. Atap aıtqanda, aǵymdaǵy jaǵdaıda eldiń eki iri jobasyn eskere otyryp, bolashaqta turaqty ósim qarastyrylyp otyr. Qashaǵandaǵy ken ornyndaǵy qýat kózderin keńeıtýdiń arqasynda óndirý kólemi táýligine 80 000 barellge artýy tıis. Bul óz kezeginde birinshi kezeńdegi jylyna 17 mln tonnaǵa jýyq (táýligine 370 myń barell) turaqty debıtiniń josparly deńgeıine shyǵýǵa múmkindik beredi. Al Teńiz ken ornynyń óndiristik qýatyn aldaǵy ýaqytta keńeıtý jobasyn júzege asyrýǵa kirisý sheshimi 2020 jylǵa qaraı jylyna 12 mln kóleminde (táýligine 260 myń barrel) óndirýdiń ósimi úshin alǵysharttar jasaıdy.
Ózderińizge belgisi, 2016 jyldyń sońynda Qazaqstan munaı baǵasynyń tómendeýin toqtatý baǵytynda OPEK jáne ózge elderdiń josparyna qosylýǵa kelisti. Keıinnen bul jospardyń kúshi taǵy toǵyz aıǵa, ıaǵnı 2018 jyldyń naýryzyna deıin uzartyldy.
Ulttyq energetıkalyq baıandamada atap kórsetilgendeı, uzaq merzimdi boljamǵa sáıkes, Qazaqstanda munaı óndirý mólsheri artady dep kútilýde jáne elimiz TMD elderinde munaı eksporty kólemi boıynsha ekinshi oryndy saqtap qalady.