Qashaǵan ken orynynyń tájirıbelik-ónerkásiptik kezeńi merziminde júzege asyrylady - Munaı jáne gaz mınıstri

ASTANA. 4 mamyr. QazAqparat /Marlan Jıembaı/ - Qashaǵan ken orynynyń tájirıbelik-ónerkásiptik kezeńi merziminde júzege asyrylady. Bul týraly búgin QR Munaı jáne gaz mınıstri Saýat Myńbaev IV Astanalyq Ekonomıkalyq forýmynyń qorytyndysyna oraı «Lıderler dıalogy jáne Nobel syılyǵy ıegerleriniń keńesteri» taqyrybynda ótken brıfıng barysynda aıtty.

«Qazaqstan munaı óndirý shyńy áli alda bolatyn sanaýly elderdiń biri. Eger kólem týrasynda aıtar bolsaq, onda ótken jyly óndirilgen munaı kólemi shamamen 80 mln. tonnany qurady», - dedi ol.

Onyń atap ótýinshe, 2015 jylǵa qaraı Qazaqstan 90-95 mln. tonna, al 2020 jylǵa qaraı 120-130 mln. tonna munaı óndirýdi josparlap otyr.

Bul oraıda mınıstr bul derekterdiń boljam emes, naqty nátıjelerge negizdelgenin basa aıtty. Sonymen qatar óndiriletin munaı kólemin arttyra túsetin de jobalar bar. Máselen, «Teńizshevroıl» kompanııasy aldaǵy ýaqytta jylyna shamamen 12 mln. tonna munaı óndiretin bolady.

«Men tipti Kaspıı qaırańy týrasynda aıtyp ta otyrǵanym joq. Eger bul týraly aıtar bolsaq, onda biz buǵan deıin kelisilgen Qashaǵan ken ornynyń tájirıbelik-ónerkásiptik kezeńi merziminde júzege asyrylady dep sanaımyz. Bul 2012 jyldyń sońy men 2013 jyl», -dedi S.Myńbaev.