Kásibı mereke: 2637 medıtsına qyzmetkeri marapattaldy

<p>ASTANA. KAZINFORM - Kásibı mereke qurmetine oraı 2637 medıtsına qyzmetkeri vedomstvolyq nagradalarmen marapattaldy, dep habarlaıdy QR DSM baspasóz qyzmeti.&nbsp;</p>

Saltanatty marapattaý rásimine sala ardagerleri, burynǵy densaýlyq saqtaý mınıstrleri, qoǵamdyq keńes músheleri, Parlament depýtattary, qoǵam qaıratkerleri shaqyryldy.

Bıylǵy jyly kásibı qyzmetindegi aıryqsha eńbegi úshin «Eńbek ardageri» medalin 250 medıtsına qyzmetkeri aldy, Densaýlyq saqtaý salasynyń 596 ókili «Densaýlyq saqtaý isine qosqan úlesi úshin» tósbelgisimen marapattaldy, «Densaýlyq saqtaý isiniń úzdigi» tósbelgisin 614 medıtsına qyzmetkeri aldy, 600 qyzmetkerge qurmet gramotalary tabystaldy jáne 577 dáriger alǵys hattar aldy.

Memleket basshysy Qazaqstannyń barlyq medıtsınalyq qaýymdastyǵyn kásibı merekelerimen quttyqtady.

«Densaýlyq saqtaý salasyn damytý, dárigerlerdi barynsha qoldaý – memlekettiń mańyzdy mindetiniń biri. Biz ózderińizdiń qajyrly eńbekterińizdi qashanda joǵary baǵalaımyz. Medıtsına qyzmetkerleriniń mártebesin kóterýge jáne olardyń quqyqtaryn qorǵaýǵa árdaıym basa nazar aýdaramyz. Jaqynda qabyldanǵan arnaıy zań – osynyń aıqyn dáleli. Sondaı-aq elimizde tuńǵysh ret «Qazaqstannyń eńbek sińirgen dárigeri» ataǵy belgilendi. Bul marapat halyqqa qaltqysyz qyzmet etken naǵyz maıtalman mamandarǵa beriledi. Sizder «Adal azamat» tujyrymdamasynyń ıdealdary men qundylyqtaryn berik ustanyp, kásibı biliktilik pen antqa adaldyqtyń úlgisin kórsetip júrsizder. Qoǵamnyń ıgiligi jolyndaǵy eseli eńbekterińiz úshin shynaıy rızashylyǵymdy bildiremin!» - delingen Qazaqstan Respýblıkasynyń Prezıdenti Qasym-Jomart Toqaevtyń quttyqtaýynda.

«Kún saıyn perzenthanalarda, jedel járdemde jáne operatsııalyq ústelde medıtsına qyzmetkerleri adamdardyń ómiri úshin úlken jaýapkershilik alady. Kún saıyn myńdaǵan shaqyrtýlar, emdeýge jatqyzý jáne emhanalarda naýqastardy qabyldaý, sátti bosandyrý jáne kúrdeli operatsııalar júrgizilip jatady. Bul bizdiń medıtsına qyzmetkerleriniń qajyrly eńbeginiń nátıjesi. Biz medıtsınalyq personaldyń yńǵaıly jumys isteýi úshin jaǵdaı jasaımyz, eńbekaqyny jaqsartamyz, bul medıtsınalyq kómektiń sapasyn arttyrady. Dárigerdiń eńbegi barǵan saıyn qurmetke ıe bolýda jáne biz qazaqstandyq medıtsınanyń jetistikterin maqtan tutamyz",- dedi QR Densaýlyq saqtaý mınıstri Aqmaral Álnazarova medıtsına qyzmetkerlerine.

Búgingi tańda memlekettik densaýlyq saqtaý júıesinde 270 myńnan astam medıtsına qyzmetkeri jumys isteıdi.