Qarjylyq saýyqtyrý baǵdarlamasy aıasynda AÓK sýbektileriniń 20-dan astam ótinimderi maquldandy

ASTANA. QazAqparat - Bıyl qarjylyq saýyqtyrý baǵdarlamasy aıasynda agroónerkásiptik keshen sýbektileriniń negizgi qaryzynyń qalǵan somasy 65,4 mlrd. teńgeni quraıtyn 24 ótinimi maquldandy. Maquldanǵan ótinimder boıynsha esepten shyǵarylǵan aıyppuldar men ósimpuldardyń somasy 856 mln. teńgege jýyq somany quraıdy. Bul týraly «QazAgro» holdınginiń baspasóz qyzmetinen habarlandy.

Aımaqtar boıynsha maquldanǵan ótinimder negizinen Aqmola, Aqtóbe, Qaraǵandy, Qostanaı, Soltústik Qazaqstan oblystary men Astana qalasyna tıesili. Al ótinimderi maquldanǵan AÓK sýbektileri ósimdik, mal, qus sharýashylyǵy jáne aýylsharýashylyq ónimderin ótkizý salalarynda jumys isteıdi.

Aıta keterligi, AÓK sýbektilerin qarjylyq saýyqtyrý baǵdarlamasymen «Qazagromarketıng» AQ operator qyzmetin atqarady jáne qarjy ınstıtýttarynan ótinimder qabyldaıdy. Al qarjylyq saýyqtyrýǵa 2014 jyldyń 1 qańtaryndaǵy jaǵdaı boıynsha ekinshi deńgeıli bankterdiń jáne lızıngtik kompanııalardyń nemese ózge de uıymdardyń aldynda qaryzdary bar agroónerkásiptik keshen sýbektileri qatysa alady.

«Sýbektilerdiń qaryzy 9 jylǵa deıingi merzimge qaıta qurylymdalýy (qaıta qarjylandyrylýy) jáne qaryz boıynsha jyldyq syıaqy mólsherlemesi teńgede 7%-ǵa jáne sheteldik valıýtada 5%-ǵa tómendetilýi múmkin. Qarjylyq saýyqtyrýǵa qatysýǵa nıet bildirgen qaryzgerler qaryz alǵan ekinshi deńgeıli bankterge, lızıngtik kompanııalarǵa nemese ózge uıymdarǵa ótinim berýi tıis», delingen baspasóz baıanynda.

Aıta keteıik, qarjylyq saýyqtyrý Qazaqstan Respýblıkasy Aýyl sharýashylyǵy mınıstriniń 2015 jylǵy 9 sáýirdegi №9-1/320 «Agroónerkásiptik keshen sýbektilerin qarjylyq saýyqtyrý jónindegi baǵyt sheńberinde kredıttik jáne lızıngtik mindettemeler boıynsha paıyzdyq mólsherlemeni sýbsıdııalaý qaǵıdalaryn bekitý týraly» buıryǵy negizinde júzege asyrylady.