Qarjylyq monıtorıng agenttigi kóleńkeli ekonomıka deńgeıin tómendetý qadamdaryn aıqyndady

NUR-SULTAN. QazAqparat – Búgin ótken kezdesý aıasynda Qarjylyq monıtorıng agenttiginiń tóraǵasy Janat Elımanov pen Qazaqstan kásipkerleriniń quqyqtaryn qorǵaý jónindegi ýákil Rýstam Júrsinov ashyqtyq jáne ózara aqparat almasý qaǵıdattary negizinde eldegi kásipkerlikti odan ári damytý boıynsha naqty áreketterdi talqylady, dep habarlaıdy QazAqparat.

«Kóleńkeli ekonomıka deńgeıin tómendetýge jáne kásipkerlik sýbektileriniń quqyqtary men zańdy múddelerin qorǵaýdy qamtamasyz etýge baǵyttalǵan birlesken bastamalardy iske asyrý josparlanýda», - delingen QR Qarjylyq monıtorıng agenttigi baspasóz qyzmetiniń málimetinde.

Qazirgi kezde agenttik adal bıznesti qorǵaýǵa baǵyttalǵan birqatar keshendi sharalar qabyldady. Adal kásipkerlerdi qorǵaý úshin «Atameken» UKP-men ózara is-qımyl turaqty negizde júzege asyrylady. Kóleńkeli ekonomıka deńgeıin tómendetý salasynda zańnamany jetildirý jáne quqyq buzýshylyqtardyń aldyn alýdy kózdeıtin Jol kartasy ázirlendi.

Aýmaqtyq ekonomıkalyq tergep-tekserý departamentteri osy tektes jumysty júrgizýge baǵyttalǵan.

«Osylaısha, kezdesýde taraptar ortaq kózqarasqa kelip, ekonomıkanyń «kóleńkeli» sektorynda quqyq buzýshylyqtardy anyqtaý boıynsha tetikterdiń tıimdiligin arttyrýda tyǵyz ózara árekettesý týraly jáne bıznestiń damýyna kedergi keltiretin júıeli problemalardy joıý boıynsha birlesken kúsh-jigerdi salýǵa kelisti.