Qarjy vıtse-mınıstri áleýmettik tólem bereshegi úshin shotty buǵattaýdyń tásilin jeńildetýdi usyndy
Onyń paıymynsha, qazirgi júıe azamattardyń ýaqyty men júıkesin bosqa shyǵyndap júr, dep habarlaıdy QazAqparat tilshisi.
«Salyqty májbúrlep óndirý týraly aıtsaq, bizde 100 myńǵa jýyq boryshker bar. Biz olardyń bank shottaryn da jaýyp tastap jatamyz. Óńirlerge jıi shyǵamyz, sonda qandaı bastapqy másele kóteriledi? Áleýmettik tólem aıasynda keshiktirilgen 100 teńge úshin nemese 1 teńge úshin salyq tóleýshiniń shotyn jaýyp tastaımyz. Sebebi zańnamada solaı kózdelgen. Mysaly, salyq bereshegi 6 AEK nemese 20 myń teńgeden assa ǵana, biz onyń shotyn jaba alamyz. Al áleýmettik tólemder boıynsha 1 teńge keshikse de, shotyn jaýyp tastaımyz. Qazirgi tańda 300 myń suraq osy másele boıynsha tústi. Sonyń 262 myńy áleýmettik tólemder boıynsha shoty jabylǵan salyq tóleýshiler», - dedi ol.
Mınıstrdiń orynbasary qazir salyq mekemeleri áleýmettik tólemderdi májbúrlep óndirýdiń organy bolyp ketkenin aıtady.
«Salyq óndirýdiń tásili bir bólek, áleýmettik tólem óndirip alýdyń tásili bir bólek. Bul másele boıynsha el ishinde jaǵymsyz kóńil kúı basym. Kóbi ony qasaqana tólemeı otyrǵan joq. 1 teńgesi qalyp qoıýy múmkin, basqa da máseleleri bar. Sol úshin shotty jaýyp tastap, ol adamdar bizge keledi. Sol bir teńge úshin 100 teńge komıssııasyn tóleıdi. Odan keıin bankke jiberip, shotyn ashqyzamyz. Onyń bári kóp ýaqyt alady, qarajat alady. Sondyqtan biz bul máselede ýnıfıkatsııa kerek dep esepteımiz. Salyq bereshegi úshin shotty buǵattaýda qandaı tásil qoldanylsa, áleýmettik tólemderge de sondaı tásil qoldaný kerek. Ol týra 6 AEK mólsherinde bola ma, 3 AEK bola ma, sony qaıta qaraý kerek. Bir teńge úshin shotyn jaýyp tastaý degen endi bul tym artyq. Qanshama ýaqyt ketedi?! Kúndelikti osyndaı máselemen oblystarǵa myńnan astam keledi», - dedi Erjan Birjanov.