Qarjy pıramıdasyna qatysty sot: Vaınerler qandaı shemamen jumys istedi
Sot otyrysy onlaın formatta ótip jatyr. Oǵan 12 aıyptalýshy qatysty. Olardyń qatarynda tanymal vaınerler Meıirjan Tórebaev pen Meıirhan Shernııazov bar. Іsti Almaly aýdandyq sotynyń sýdıasy Kámshat Saýrova qaraýda.
Basty sot otyrysynda prokýror Erlan Qulanbaev aıyptaý qorytyndysyn oqydy. Memlekettik aıyptaýshynyń aıtýynsha, 2019 jyldyń basynda ınvestıtsııa salasynda kásipkerlik qyzmette tájirıbesi bar K. qarjy pıramıdasyn qurǵan.
Aıyptaý qorytyndysyna sáıkes, ol óziniń jaqyn týysy M.-ny uıymdasqan qylmystyq topqa qosyp, oǵan ártúrli tapsyrmalardy oryndaý mindetin júktegen. Al ol óz kezeginde 2019 jyly «ACD Technology» men «Astex» JShS-in tirkegen.
Odan ári K., uıymdasqan qylmystyq toptyń uıymdastyrýshysy bola otyryp, salymshylarǵa aıyna 20%-ǵa deıin, ıaǵnı jylyna 240%-dy quraıtyn depozıtter boıynsha joǵary kepildik berilgen tabysqa ýáde bergen. Sonymen birge ol turaqty paıda alý úshin jańa ınvestorlardyń sanyn únemi kóbeıtý qajet ekenin túsindi.
Osylaısha, eki JShS tirkelgennen beri kóptegen ınvestorlarmen kelisimsharttar jasaldy. Zardap shekkender arasynda 70, 80 jáne 125 mıllıon teńgeden astam qarjy salǵandar da bar. Barlyǵy 2 mıllıard teńgeden astam somaǵa kelisimsharttar jasaldy.
Birneshe aıdan keıin olar óz qyzmetine senimdi jáne zańdy bolyp kóriný úshin tanymal tulǵalardy tartty, Ázimjan Saıdbaev jáne Meıirhan Shernııazov iske qosyldy.
«Bul adamdar usynylǵan is-áreketterdiń zańsyzdyǵyn túsinip, qarjy pıramıdasyna qatysýǵa óz kelisimderin berdi. Olardyń róli personaldy basqarý, oıdan shyǵarylǵan kelisimsharttardy daıyndaý jáne resimdeý, áleýetti ınvestorlarmen kezdesý, qarjylyq pıramıdany jarnamalaý, salymshylardyń qarajatyn tartý boldy», - dedi Erlan Qulanbaev.
2020 jyldyń mamyr aıynda jańa «Mudarabah Capital» JShS tirkeldi. Bul kompanııany ınvestorlardan aqsha tartý quraly retinde paıdalandy. Sol jyldyń maýsym aıynda Mudarabah Capital men Astex arasynda kelisim jasaldy, oǵan sáıkes alǵashqysy klıentterdi izdeýge, Astex atynan kelisim jasaýǵa, kelisim jasalǵannan keıin keńes berýge jáne basqa da zańdy operatsııalardy júrgizýge mindettendi.
«Bul kelisim Mudarabah Capital-dyń Astex qurylymdyq bólimshesi bolǵanyn kórsetedi»,- dedi prokýror.
«Mudarabah Capital» JShS negizin qalaýshylardyń biri bolǵan B. dırektor bolyp taǵaıyndaldy. Quryltaıshy Azımjan Saıdbaev áleýmettik jelilerde úgit-nasıhat jumystaryn júrgizýi kerek edi. Ol quryltaıshylar arasynda qarjy bólýge de atsalysty.
Memlekettik aıyptaýshynyń sózinshe, 2020 jyldyń qyrkúıek aıynyń sońynda Saıdbaev, Shernııazov jáne basqalary qarjy pıramıdasyn tanymal etý úshin áleýmettik jelilerde mıllıonnan asa oqyrmany bar Meıirjan Tórebaevqa júgingen. Oǵan syıaqy beriletini ýáde etilip, birlesken qylmystyq áreketterge tartylǵany aıtyldy.
«Tórebaev usynystyń zańsyz ekenin túsinip, pıramıda isten shyqsa, qylmystyq jaýapkershilikten jaltaryp kete alatynyna senimdi bolyp, kelisimin berip, uıymdasqan qylmystyq topqa qosylǵan. Ol salymshylarǵa paıyz tóleý múmkin emesin, bul zańsyz qarjy pıramıdasy ekenin, jumystyń tabystylyǵyn baǵalap, salymshylardyń qarajatynan aıyrylatynyn túsine otyryp, jumysqa kiristi»,- dedi dedi memlekettik aıyptaýshy.
Onyń aıtýynsha, Tórebaev pıramıdany keńinen nasıhattap, úgit-nasıhat jumystaryn júrgizip, oǵan qarjy salynyp jatqanyn, munyń bári zańdy ekenin áleýmettik jelilerde kórsetýi kerek edi. Barlyq quryltaıshylardyń jarǵylyq kapıtalda 11-11,5% úlesi boldy.
Keıin sýdıa Kámshat Saýrova aıyptalýshylardyń taǵylǵan aıypqa qatysty pikirin surady. Shernııazov pen Tórebaev qarjy pıramıdasyn qurdy jáne uıymdastyrdy degen aıyppen kelispeıtinin jáne kináni moıyndamaıtynyn aıtty.
Buǵan deıin sot vaıner Meıirjan Tórebaevty tergeý abaqtysynan úıqamaqqa aýystyrǵan bolatyn.
Aıta keteıik, 12 jeltoqsanda qarjy pıramıdasyn qurdy dep aıyptalǵan tanymal vaınerlerdiń isi sotqa joldanǵan bolatyn.
Qarjy pıramıdasy isi boıynsha, A. Oraz pen A. Saıdbaevqa halyqaralyq izdeý jarııalanǵan. Qadaǵalaý organynyń málimetinshe, qylmystyq istiń negizinde 41 jyljymaıtyn múlikke, 3 avtokólikke, 9 bank shotyna jáne 16 kompanııanyń jarǵylyq kapıtalyndaǵy ártúrli úlesterge tyıym salyndy.
Tanymal vaınerler Meıirjan Tórebaev pen Meıirhan Shernııazovqa QR Qylmystyq kodeksiniń 217-baby 3-bóligi boıynsha aıyp taqty.