Qarjy pıramıdasyna aldanyp qalmaýdyń qandaı amaly bar

NUR-SULTAN. QazAqparat – Elimizde qarjy pıramıdalarynyń qurbany bolyp, jeke múlki men qarajatynan aırylyp jatqan azamattar qanshama. Osy oraıda Іshki ister mınıstrligi qarjy pıramıdalarynyń jumys isteý ádis-tásiline qatysty túsinik berdi, dep habarlaıdy QazAqparat tilshisi.

«Eger sizge klıentter tartsańyz qosymsha aqy (bonýs) tólenedi dese, demek ol kúdik týǵyzýǵa tıis. Árıne, siz oǵan óz jaqyndaryńyz ben tanystaryńyzdy tartasyz. Solaısha olardyń da basyn qaýipke tigesiz. Ekinshiden, olar mol tabysqa tez ári jeńil qol jetkizýge ýáde beredi. Kelesi jaıt - qyzmet etýge ruqsat beretin lıtsenzııa. Mekemeniń zańdy lıtsenzııasy bolmasa, demek ol - qarjy pıramıdasy. Sol sııaqty alǵashqy jarna tóleý ádisi de solarǵa tıesili. ıAǵnı, túrli aktsııany oılap tabady nemese sizdiń biliktiligińizdi kóteremiz, oqýǵa jiberemiz dep ýáde etedi», - dedi QR ІІM tergeý departamentiniń basshysy Sanjar Ádilov brıfıngte.

Departament basshysynyń aıtýynsha, qarjy pıramıdasy qyzmetine tán taǵy bir fakti kompanııanyń bıýdjeti bolmaıdy, olarǵa aqshany klıentter alyp keledi.

«Keıbir qarjy pıramıdasy shaǵyn nemese ortasha qarjy mekemesi retinde jumys istep, klıentterdi ınvestıtsııa quıýǵa shaqyrady. Sondaı-aq, qymbat aktıvter týraly da sóz qozǵaýy múmkin. Al is júzinde olardyń ózinde eshqandaı qarajat ta, aktıv te joq. Odan keıin, jarnama. Qazir jarnama jasaýdyń túrli ádisi bar. Ásirese áleýmettik jeliniń kómegimen. Sondyqtan jelidegi jyltyraǵannyń bárine sene bermegen jón. Odan bólek, sizben kelisimshart jasaıdy, sol kezde qujatty muqııat oqyp shyǵyńyz. Kóp jaǵdaıǵa azamattar mán bermeı qol qoıa salady», - deıdi ol.

Sondaı-aq, spıker qarjy pıramıdalary klıentpen jeke jumys istegendi jón sanaıtynyn aıtty.

Onyń sebebi - jalǵyz adamdy áńgimelesý arqyly kóndirý ońaıyraq. Basqasha aıtqanda, psıhologııalyq ádis.

Buǵan deıin habarlaǵanymyzdaı, Qazaqstanda 30 myńnan astam adam qarjy pıramıdalaryna aldanǵan.