Qarjy pıramıdasyn quryp, 1 mlrd teńgeni qaltasyna basqan aqtóbelik sottaldy

AQTÓBE. QazAqparat – Aqtóbede 192 adamnan 1 mıllıard teńgeden astam aqsha jınap alǵan qarjy pıramıdasynyń basshysy sottaldy. Ol 6 jylǵa bas bostandyǵynan aıyryldy, dep habarlaıdy QazAqparat tilshisi.

Aqtóbe qalasynyń № 2 sotynda asa iri mólsherde aqsha jınap, qarjy pıramıdasyn qurdy jáne oǵan basshylyq jasady degen aıyppen is qaraldy.

Іs materıalyna súıensek, 1990 jyly týǵan sottalýshy 2019 jyldyń 01 jeltoqsany men 2020 jyldyń 22 aqpany aralyǵynda quqyqbuzýshylyq jasady.

Barlyǵy 192 azamattyń jalpy somasy 1 mıllıard teńgeden astam aqshasyn alǵan.

Sot otyrysy kezinde salymshylardyń shyǵyny 825 mln teńgeden asqany belgili boldy. Sottalýshy óz kinásin tolyq moıyndap, jasaǵan isine ókindi.

Sotta prokýror sottalýshyǵa 8 jylǵa bas bostandyǵynan aıyrý jazasyn taǵaıyndaýdy surady.

«Sot sottalýshynyń shyn júrekten ókinetinin, kámelet jasqa tolmaǵan balasyn eskerdi. Sot úkimimen sottalýshy kommertsııalyq jáne qarjy uıymdarynda 7 jyl merzimge basshylyq laýazymdardy atqarý quqyǵynan aıyryldy. Sonymen birge 6 jyl merzimge bas bostandyǵynan aıyrý jazasy taǵaıyndaldy. Sot úkimi zańdy kúshine engen joq», - dep habarlady Aqtóbe qalasy №2 sotynyń baspasóz qyzmeti.

Sonymen birge jábirlenýshilerdiń azamattyq aryzy qanaǵattandyryldy. Olar 100 myń teńgeden bastap 12 mln teńgege deıin aqsha salǵan.

Aldanyp qalǵandardyń kóbi Aqtóbe oblysynyń turǵyndary bolǵanymen, Atyraý, Almaty azamattary da bar.

Sot sottalýshynyń jalǵyz baspanasyn ózinde qaldyrdy. Al shyǵyndy óteý úshin keńse ǵımaraty tárkilendi.