Qarjy pıramıdasy qaǵıdatymen áreket etken alaıaqtar toby ustaldy

TALDYQORǴAN. QazAqparat - Qarjy pıramıdasy qaǵıdaty boıynsha áreket etken alaıaqtar tobyn Jetisý oblysynyń polıtseıleri ustady, dep habarlaıdy QazAqparat Polisia.kz-ke silteme jasap.

Búgingi tańda tergeý materıaldarynda Qazaqstannyń ár óńirinen 25 jábirlenýshi bar. Taldyqorǵan mańynda turatyn erli-zaıyptylar, sondaı-aq Túrkistan oblysynyń Lenger qalasynyń turǵyndary top quramynda bolǵan. Kúdiktiler ózderiniń alaıaqtyq áreketteri úshin Whatsapp messendjeriniń múmkindikterin paıdalanyp, onda bir aptaǵa jýyq ýaqytqa sozylǵan arnaıy chat qurǵan. Jábirlenýshiler bankterdiń biriniń arnaıy shotyna 10 myńnan bastap 100 myń teńgege deıin aqsha jiberip otyrǵan. Bastapqyda ýáde etilgen paıdanyń 50-70%-y alynǵan. Ekinshi márte jiberilgen úlken soma, árıne, qaıtarylmady.

«Taldyqorǵandaǵy shottan aqshalaı qarajat alynǵany belgili boldy. Osyǵan baılanysty jábirlenýshilerdiń aryzdary Jetisý polıtsııasynda resmı túrde tirkeldi. Derekter boıynsha tergeý amaldary QR QK-niń 190-babynyń 3-bólimine (Alaıaqtyq) sáıkes, Taldyqorǵan qalasy prokýratýrasynyń úılestirýimen júrgizildi. Qylmystyq iste eldiń ár aımaqtarynda turatyn 20-dan astam adam bolǵanyn eskere otyryp, faktilerdi tergeý bir jyldan astam ýaqytty aldy. Qazirgi ýaqytta aıyptaý aktisi qylmystyq isti sotqa jiberý úshin daıyndaldy», – dedi Jetisý oblysy PD TB aǵa tergeýshisi Azamat Tynysbaev.

Qylmystyq is materıaldaryna sáıkes keltirilgen zalal 5 mln teńgeden astam.