Qarjy pıramıdasy bolýy múmkin: Zańsyz qyzmet belgileri bar uıymdardyń tizimi jarııalandy

NUR-SULTAN. QazAqparat - QR Qarjy naryǵyn retteý jáne damytý agenttigi zańsyz qyzmet belgileri bar uıymdardyń tizimin jarııalady, dep habarlaıdy QazAqparat.

Tizimge 121 sýbekt, onyń ishinde qarjy pıramıdasynyń belgileri bar 56 uıym jáne 65 zańsyz ınvestıtsııalyq deldal (jalǵan broker) engizildi.

Agenttik olardyń qyzmetinde zańsyz qyzmet belgilerin anyqtady.

Tizimdi jarııalaý qarjylyq qyzmetterdi tutynýshylardyń quqyqtaryn qorǵaýǵa baǵyttalǵan jáne osyndaı kompanııalarǵa baılanysty táýekelderdiń ýaqtyly aldyn alýǵa múmkindik beredi.

Sonymen birge osyndaı tizimdi qalyptastyrý naryqtaǵy ádil básekelestikti qoldaýdy jáne zańsyz qyzmet belgileri bar sýbektilerdi tıimdi túrde anyqtaýdy qamtamasyz etedi.

Agenttik qarjy naryǵyndaǵy zańsyz qatysýshylardy mynalar:

- ınternettegi aqparattyq keńistikti monıtorıngteý;

- blogtar, forýmdar, beınehostıngter jáne messendjerler arqyly áleýmettik jelilerdi monıtorıngteý;

- jeke jáne zańdy tulǵalardyń ótinishteri (aǵymdaǵy jyldyń basynan bastap Agenttikke kúmándi kompanııalardyń qyzmeti boıynsha jeke jáne zańdy tulǵalardan 125 ótinish kelip tústi);

- azamattyq qoǵam ınstıtýttaryn bildiretin memlekettik organdarmen jáne qoǵamdyq uıymdarmen ózara is-qımyl sheńberinde anyqtaıdy.

Barynsha tıimdi habardar bolý maqsatynda agenttik qarjy naryǵynyń barlyq sýbektilerine kúdikti kompanııalar týraly habarlaıdy.

Sondaı-aq osyndaı kompanııalardyń saıttaryn odan ári tekserý jáne buǵattaý úshin quqyq qorǵaý jáne basqa da ýákiletti organdarmen birge ózara áreket etedi.

Zańsyz qyzmet belgileri bar árbir kompanııa boıynsha ataýy, saıt mekenjaıy, zańsyz qyzmet sıpaty kórsetilgen.

Budan ári aqparat turaqty túrde jańartylyp otyrady.

Zańsyz qyzmet belgileri bar uıymdardyń tizimimen myna jerde tanysýǵa bolady.