Qarjy naryǵynyń qatysýshylaryna arnalǵan fingramota.kz saıty iske qosyldy

ASTANA. QazAqparat - Qazaqstan Ulttyq Banki fingramota.kz saıtyn iske qosty, dep habarlaıdy QazAqparat. Bul týraly atalmysh qarjy qurylymynyń facebook-tegi paraqshasynda jazyldy.

«Qarjylyq saýattylyq - adamnyń qarjylyq ál-aýqatyn kóterýge jáne osy deńgeıde ómir boıy qalýyna múmkindik beretin bilim. Qarjylyq turǵydan saýatty adam óziniń kiristeri men shyǵystaryna qatysty sheshimderin saralap, aqylǵa salyp qabyldaıdy, qarjy áleminen habardar bolady, qarjylyq qyzmetterdi ońtaıly tańdaıdy, qarjylyq qyzmetterdi tutynýshy retinde óz quqyqtaryn biledi»,- delingen habarlamada.

Fingramota.kz saıty (https://fingramota.kz/kz/) qarjy naryǵynyń qatysýshylary men jýrnalısterge ǵana emes, óziniń qarjylyq saýattylyǵyn arttyrǵysy keletin kóptegen oqyrmandarǵa paıdaly bolmaq.

Saıtta 8 bólim bar: «Ulttyq valıýta», «Depozıtter», «Kredıtter», «Saqtandyrý», «Otbasy bıýdjeti», «Tólemder men aýdarymdar», «Normatıvtik quqyqtyq baza», «Zeınetaqy júıesi». Fingramota.kz saıtynda árqashan da valıýtalardyń jańartylǵan baǵamdary, qarjy jańalyqtary, qarjylyq saýattylyq jónindegi baǵdarlamalar berilgen beınegalereıa jáne basqalary bar.

Qazirgi kezde Fingramota.kz saıty ázirlenip, damytylýda, tıisinshe, bul resýrsta áli de kóptegen qyzyqty da paıdaly keńester, pikirterimder, foto jáne beınematerıaldar jarııalanatyn bolady.