Qarjy naryǵyndaǵy ahýaldy damytýdyń keleshegi qandaı

ASTANA. QazAqparat – AQSh federaldy rezerv júıesiniń kúsheıtilgen aqsha-kredıt saıasaty – AQSh dollary baǵamynyń jahandyq nyǵaıýynyń negizgi qozǵaýshy kúshi. Sondyqtan, bul júıeniń kúsheıý tsıkli qanshalyqty uzaqqa sozylatyny jónindegi másele álemdik valıýta naryǵyndaǵy belgisizdiktiń negizgi faktory bolyp qala beredi. Ulttyq bank tóraǵasynyń orynbasary Álııa Moldabekova osyndaı boljam aıtty, dep habarlaıdy QazAqparat.

«Bıyl búkil álemdegi Ortalyq bankterdiń mólsherlemeni bir mezette ári tez kótergenin baıqadyq. Jahandyq ınvestorlar osy kúsheıtý tsıklindegi mólsherlemelerdiń sharyqtaý shegin izdep jatyr. Goldman Sachs taldaýyna sáıkes (G10 elderi arasynda mólsherlemelerdi arttyrýdyń 85 epızody), mólsherlemelerdi arttyrý tsıkli orta eseppen 15 aı boıy jalǵasyp keledi, barlyq epızodtardyń 70%-y bir jyldan astam ýaqytqa sozylyp otyr.

Keıbir ekonomısterdiń pikirinshe, jalpy qolaıly ekonomıkalyq ahýal retsessııasyz saqtalǵan jaǵdaıda, AQSh FRJ-niń mólsherlemelerdi arttyrý tsıkli uzaqqa sozylady, biraq kelesi jyly bir júıege túsetin bolady. AQSh FRJ-niń kelesi otyrysynda taldaýshylar jeltoqsanda mólsherlemeniń ósý qarqynynyń 50 bazıstik tarmaqqa deıin tómendeıtinin jáne 2023 jylǵy aqpan men naýryz aılarynda eki ret 25 bazıstik tarmaqqa artatynyn boljaıdy.

Bloomberg taldaýshylarynyń konsensýsyna sáıkes, 2023 jyly DXY ındeksi

álsireıdi dep kútilip otyr.

Sonymen qatar, AQSh FRJ saıasatyndaǵy áleýetti ózgerý onyń geosaıası belgisizdik kezeńindegi qaýipsiz aktıv mártebesine jáne dollardaǵy aktıvterdiń absolıýttik máninde joǵary kiristiligine baılanysty AQSh dollary ústemdiginiń aıaqtalýyna alyp kelmeýi múmkin ekenin atap ótý qajet.

Munaı naryǵyna qatysty OPEK+ álemdik ekonomıkalyq ósýdiń baıaýlaýy týraly kútýlerden otynǵa degen suranystyń áleýetti tómendeýin óteý úshin óndirýdi azaıtý jónindegi sheshiminiń arqasynda qara altynnyń quny aıtarlyqtaı qalpyna keldi.

Alaıda, bul kvotalar osy jyldyń sońyna deıin ǵana qoldanylady, sondyqtan olardyń qoldanylý uzaqtyǵy týraly sheshim 2023 jyly naryqtyń teńgerimdiligi men dınamıkasyna áser etedi. Óz kezeginde, AQSh OPEK+ sońǵy sheshimine úzildi-kesildi qarsy shyqty jáne birqatar qarsy sharalardy, onyń ishinde munaıdy memlekettik strategııalyq qorlardan alý, sondaı-aq OPEK múshelerine monopolııaǵa qarsy talap qoıý arqyly karteldiń baǵa belgileýine tyıym salýǵa múmkindik beretin NOPEC zańyn qabyldaýdy qarastyryp jatyr. Sonymen qatar, atalǵan zańnyń qabyldanýy ekitalaı. Jalpy alǵanda, 2023 jyldyń 1-toqsanynda munaı baǵasyn ekonomıster 1 barrel úshin 84-115 AQSh dollary aralyǵynda bolady dep boljaıdy», - deıdi Álııa Moldabekova.