Qarjy mınıstrliginde memqyzmettiń 92 paıyzy elektrondy túrde kórsetiledi

NUR-SULTAN. QazAqparat – Qarjy mınıstrliginde memlekettik qyzmettiń 92 paıyzy elektrondy túrde kórsetiledi. Bul týraly QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Qarjy mınıstrligi búginde memlekettik qyzmettiń 50 túrin kórsetedi, onyń 46-sy nemese 92 paıyzy elektrondy túrde kórsetiledi. Aǵymdaǵy jyldyń 11 aıynda 17,9 mln-ǵa jýyq qyzmet kórsetilgen. Olardyń 17,4 mln-ny nemese 97,2 paıyzy elektrondy túrde», - dedi E. Jamaýbaev Májilistegi Úkimet saǵatynda.

Onyń aıtýynsha, negizgi qyzmet túrleri salyq salý men keden baǵytyna tıesili. Memlekettik qyzmet kórsetýdiń merzimderin qysqarta otyryp, memlekettik organdardyń derekqorlarymen ıntegratsııalaý azamattar men bıznestiń ýaqyty men shyǵyndaryn únemdeýge múmkindik beredi. Sondaı-aq, qyzmet kórsetýshimen tikeleı qarym-qatynas azaıady.

«Bul korrýptsııalyq táýekeldi barynsha qysqartýǵa múmkindik beredi. Salyq tóleýshilerge yńǵaıly bolý úshin qyzmetterdi «eGov mobile» mobıldi qosymshasyna jáne banktik qosymshalarǵa kóshirý boıynsha jumystar júrgizilip jatyr. Jalpy, tsıfrlandyrý boıynsha júrgizilip jatqan jumystar Qarjy mınıstrligi qyzmetiniń barlyq baǵyttaryn qamtıdy. Atap aıtsaq, bul: strategııalyq jáne bıýdjettik josparlaý, memlekettik satyp alý, bıýdjettiń oryndalýy, memlekettik aýdıt jáne kameraldyq baqylaý, salyqtyq jáne kedendik ákimshilendirý», - dedi mınıstr.