Qarjy mınıstrligi saılaýǵa ketetin shyǵystardyń keıbirimen kelispedi

NUR-SULTAN. QazAqparat - QR Qarjy mınıstrligi aldaǵy ýaqytta ótetin kezekten tys prezıdenttik saılaýǵa jumsalatyn shyǵystardyń keıbir bóligine kelisim bermedi. Bul týraly búgin Ortalyq saılaý komıssııasynyń hatshysy Sábıla Mustafına aıtty, dep habarlaıdy QazAqparat tilshisi.

«Qarjy mınıstrligine jiberilgen osy jolǵy saılaý naýqanyna arnalǵan shyǵystardyń boljamdy smetasy shamamen 12 mlrd teńgeni quraıdy. «Saılaý týraly» Konstıtýtsııalyq zańǵa sáıkes Ortalyq saılaý komıssııasy atalǵan saılaý naýqanyn ótkizý úshin shyǵystardyń boljamdy smetasyn esepteıdi. Ol atalǵan normaǵa saı ázirlengen jáne Qarjy mınıstrligine jiberilgen somanyń 77 paıyzy ýchaskelik jáne aýmaqtyq saılaý komıssııalarynyń músheleriniń jalaqysyna eseptelgen. Bul esepteý eń tómengi jalaqyny negizge ala otyryp jasaldy», - dedi ol.

Onyń aıtýynsha, ýchaskelik jáne aýmaqtyq saılaý komıssııalarynyń quramynda bıýdjet qyzmetkerleri, zeınetkerler, ózin-ózi jumyspen qamtyǵandar jáne stýdentter bar.

«Qarjy mınıstrligine ótinimhat jibergenimizge eki kún ótti. Búgin qorytyndy kútip otyrmyz. Biraq, keıbir pozıtsııalar qoldaý tappady. Ol keıbir shyǵystardy ońtaılandyrýmen baılanysty. Bul durys ta. Sebebi bul boljamdy smeta edi. Buǵan qosa Qarjy mınıstrligi óńirlerdiń baǵa usynystaryn da jiti qarap shyqty. Biz smetany aýmaqtyq saılaý komıssııalarynyń bıýdjettik ótinimi negizde jasadyq. Al ár óńirdiń ózindik baǵa saıasaty men naryqtyq jaǵdaıy bar»,- dedi OSK múshesi.

Osy rette Sábıla Mustafına kelesi aptanyń basynda Úkimette aldaǵy saılaýǵa jumsalatyn shyǵyndardyń smetasy qaralatynyn aıtty.