Qarjy mınıstrligi Prezıdent Joldaýy aıasynda qandaı sharalar atqarylatynyn talqylady

NUR-SULTAN. QazAqparat - Qarjy mınıstrligi Qazaqstan Respýblıkasy Prezıdentiniń Joldaýynyń negizgi erejelerin talqylap, tapsyrmalar berdi, dep habarlaıdy QazAqparat mınıstrliktiń baspasóz qyzmetine silteme jasap.

Búgin QR Premer-Mınıstriniń birinshi orynbasary – Qarjy mınıstri Á. Smaıylovtyń tóraǵalyǵymen Qazaqstan Respýblıkasy Prezıdentiniń Joldaýynyń negizgi erejelerin túsindirý boıynsha alqa otyrysy ótti.

Alqa jumysyna qurylymdyq bólimsheler men vedomstvolyq baǵynysty uıymdardyń basshylary qatysty.
Memlekettik satyp alý zańnamasyn jetildirý máseleleri boıynsha vıtse-mınıstr Rýslan Beketaev sóz sóıledi.
Vıtse-mınıstr Tatıana Saveleva Respýblıkalyq bıýdjettiń parametrlerin Prezıdent Joldaýyn qarjylyq iske asyrý quraldarynyń biri retinde atap ótti.

Memlekettik kirister komıtetiniń tóraǵasy Marat Sultanǵazıev bıýdjet kiristerin ulǵaıtý boıynsha júrgizilip jatqan jumystarymen bólisti, sondaı-aq mıkro jáne shaǵyn bıznes kompanııalaryn tabys salyǵyn tóleýden úsh jyl merzimge bosatý sharalary týraly habarlady.

Budan basqa, kedendik ákimshilendirýdi kúsheıtý úshin Keden isi salasynda quqyq buzýshylyq jasaǵany úshin SEQB jaýapkershiligin kúsheıtý josparlanýda. Sondaı-aq kapıtaldardy Qazaqstannan tys jerlerge shyǵarýǵa qarsy kúres maqsatynda ekinshi deńgeıdegi banktermen jumys jalǵastyrylatyn bolady.

Qarjy monıtorıngi komıtetiniń tóraǵasy Ábilqaıyr Sqaqov kóleńkeli ekonomıkaǵa qarsy is-qımyl sharalaryn kúsheıtý sheńberinde birqatar zańnamalyq bastamalar engizýdi usyndy.

Alqa otyrysyn qorytyndylaı kele, Álıhan Smaıylov Memleket basshysy aıtqan barlyq tapsyrmalardyń ýaqtyly jáne sapaly oryndalýyna nazar aýdardy, sondaı-aq Memleket basshysynyń Joldaýyn iske asyrý jónindegi Jalpyulttyq is-sharalar josparyn jobaǵa engizý úshin usynystar daıyndaýdy tapsyrdy.