Qarjy mınıstrligi onlaın kassa mashınasyna balama ádisti qarastyrýda

NUR-SULTAN. QazAqparat - QR Qarjy mınıstrligi 2020 jyldyń sońyna deıin onlaın baqylaý-kassalyq mashınasyna balama retinde dara kásipkerlerge (ózin-ózi jumyspen qamtýshylarǵa, salyq tóleýshilerge, patent boıynsha jumys isteıtinderge) arnalǵan tegin mobıldik qosymsha ázirleýge yqpal etetinin málimdedi, dep habarlaıdy QazAqparat Memlekettik kirister komıtetine silteme jasap.

«Shaǵyn jáne orta bıznes ókilderi úshin Memlekettik kirister komıtetiniń aqparattyq júıelerin ekinshi deńgeıli banktermen ıntegratsııalaý jumystary júrgizilýde. Aldaǵy ýaqytta jeke tulǵalar men kásipkerlerdiń aqshalaı aýdarymdary úshin paıdalanylatyn mobıldi qosymsha onlaın BKM men pos-termınaldardyń tegin balamasy retinde jumys istemek. Oǵan qosa jańa júıe onlaın tirkeýge turý, onlaın túrde salyq boıynsha esep tapsyrý jáne salyq tóleý syndy fýnktsııalardy qamtymaq», delingen habarlamada.

Qazirgi tańda onlaın baqylaý-kassalyq mashınasy salyqtyq ákimshilendirýdiń negizgi tetigi bolyp otyr. Onlaın baqylaý-kassalyq mashınasynan alynǵan derekter Memlekettik kirister komıtetine taýarlar men qyzmetter úshin tólengen qarajatqa saraptama jasaýǵa múmkindik beredi.

«Onlaın túbirtekter aýqymdy derekter qoryn jınaıtyndyqtan, Memlekettik kirister komıtetiniń aqparattyq júıesin barlyq saýda núktelerimen ıntegratsııalaý tıimsiz. Sondyqtan fıskaldy derekterdi qabyldaý, saqtaý jáne MKK aqparattyq júıesine joldaý fýnktsııasyn fıskaldyq derekter operatory arqyly júzege asyrý týraly sheshim qabyldanǵan. Mundaı tájirıbe álemniń ózge elderinde de keńinen qoldanylady. Al kórshiles Reseı Federatsııasyn mysalǵa alar bolsaq, onda fıskaldyq derekter ǵana emes, shot faktýralardyń aqparattyq júıesi de jeke menshik operatorlarǵa berilgen», delingen habarlamada.

Qazaqstanda 2014 jyldan bastap fıskaldyq derekter operatory retinde «Qazaqtelekom» AQ jumys istep kelgen. Al 2019 jyly bul qyzmetti básekelestik ortaǵa berý týraly sheshim qabyldandy. Osylaısha, qazirgi tańda fıskaldyq derekter operatory fýnktsııasyn 4 zańdy tulǵa júzege asyrýda («Qazaqtelekom» AQ, «Transtelekom» AQ, «Kar-tel» JShS jáne «KazTransCom» JShS). Bul sharalar qyzmettiń qunyn tómendetip, sapasyn arttyrý maqsatynda qolǵa alynǵan. Búginde «Transtelekom» AQ qyzmet qunyn 1 400 teńgege deıin tómendetti.

«Onlaın baqylaý-kassalyq mashınalaryn paıdalaný otandyq IT salasyn damytýǵa úles qospaq. Búginde smartfondarda mobıldi onlaın baqylaý-kassalyq mashınalary qosymshasynyń birneshe túri bar. Olardyń keıbiri aqysyz negizde jumys isteıdi. QR QM mamandary mundaı pılottyq jobalardyń múmkindikteri men qaýipsizdigin zertteýde», delingen habarlamada.