Qarjy mınıstrligi dempıngke qarsy sharany oılap tapty

ASTANA. QazAqparat - QR Qarjy mınıstrligi memlekettik satyp alýlar kezinde baǵany tómendetýge qarsy normany engizýdi kózdeıdi. Osyǵan oraı, arnaıy zańnamaǵa qatysty ózgerister ázirlendi, dep xabarlaıdy QazAqparat tilshisi.

QR Qarjy vıtse-mınıstri Rýslan Beketaevtyń aıtýynsha, memlekettik satyp alýlar kezinde eń tómengi baǵanyń shekti mólsheri belgilenetin bolady. Odan tómen baǵa qoıylsa, satyp alýlar oryndalmaıdy. "Ásirese, qurylys salasynda dempıng órship tur. Sonyń saldarynan sapa da syn kótermeıdi. "Máselen, shartty túrde baǵanyń mólsheri 10 protsent bolady. Odan tómen túsýge bolmaıdy. Al qurylys jumystaryna qatysty atalǵan kórsetkish 15 protsent bolady dep otyrmyz. Osy mejeden tómen baǵa qoıylsa, mashına (memlekettik satyp alýlardyń elektrondy júıesi - avt.) avtomatty túrde ondaı ótinimdi qaıtaryp tastaıdy", - dedi R.Beketaev búgin Parlament Májilisinde arnaıy zańnamany tanystyrý kezinde.

Aıta keteıik, búginde Qazaqstanda memlekettik satyp alýlardyń jalpy somasy 3,2-3,5 trln teńgeni qurap otyr. Budan bólek, "Samuryq-Qazyna" qory 4-5 trln teńgege, al qalǵan ulttyq kompanııalary shamamen 2 trln teńgege satyp alýlar júrgizedi. Osylaısha kvazımemlekettik saladaǵy satyp alýlardyń jalpy kólemi 7 trln teńgege jetip otyr.