Qarjy mınıstrligi bıýdjet jobasyn aldyn ala baǵalaýdaǵy problemalardy atady

ASTANA. QazAqparat - Vedomstvolar arasynda bıýdjettik ınvestıtsııalyq jobalardyń iske asyrylýyna monıtorıng qorytyndylary bóliginde aqparat almasý durys júrgizilmeıdi. Bul týraly Senatta bıýdjettiń oryndalýyn baqylaý taqyrybyna arnalǵan dóńgelek ústel otyrysynda QR Qarjy vıtse-mınıstri Tatıana Saveleva málim etti, dep habarlaıdy QazAqparat.

«Ótken jyly tájirıbe júzinde iske asyrylǵan sharalar bıýdjet jobasyn aldyn ala baǵalaý qadamy mańyzdy ári qajetti tetik ekenin kórsetti. Osy oraıda bıýdjet shyǵystarynyń naqtylyǵyn aıqyndaýmen qatar, strategııalyq jáne bıýdjettik josparlaýdy jetildirýdiń ári úılestirýdiń tıimdi quraly retinde tanyldy. Sonymen birge, baǵalaý birqatar mańyzdy problemalardy anyqtady. Birinshiden, sońǵy 10 jylda engizilgen nátıjelerge baǵdarlanǵan bıýdjetteý elementteri tolyq shamada jumys istemeıdi jáne kútiletin bastapqy nátıjeni bermeı otyr. Ekinshiden, bıýdjettik josparlaýdyń strategııalyqqa qaraǵanda basym bolýy baıqalýda», - dep toqtaldy T. Saveleva.

Vıtse-mınıstrdiń sózine qaraǵanda, strategııalyq josparlardyń maqsattaryna jetýdiń tıimdiligin baǵalaýdy júrgizý men bıýdjet baǵdarlamalarynyń kórsetkishteri jáne bıýdjettik ınvestıtsııalyq jobalardy iske asyrý monıtorıngi merzimi bıýdjettiń lımıtteri men jobasyn qalyptastyrý ýaqytymen sáıkes kelmeıdi.

Sonymen qatar ol Parlamentke engiziletin bıýdjet jobasyn aldyn ala baǵalaý aıasynda Esep komıteti usynymdarynyń eskerilmeıtinin sóz etti.

Onyń paıymynsha, bul problemalardyń ózindik sebepteri de bar. Bul turǵyda birinshi sebep memlekettik qyzmette bilikti kadrlardyń tapshylyǵyna, onyń ishinde kvazımemlekettik sektorǵa kadrlardyń aýysýyna baılanysty bolyp otyr.

«Nátıjesinde, bıýdjettik baǵdarlama ákimshileri boıynsha tıisti problemalar baıqalyp otyr. ıAǵnı naqty maqsattardy qoıa almaý, tıimdilik pen nátıjelilik kórsetkishterdi aıqyndaı almaý, bıýdjettik ótinimderdiń sapasy men tolyqtyǵy deńgeıiniń jetkiliksizdigi sııaqty máseleler bar. Ekinshiden, ortalyq memlekettik organdardyń da, sol sııaqty óńirlerdiń tómen materıaldyq-tehnıkalyq bazasy yqpal etýde. Osy oraıda aǵymdaǵy mindetterdi sheshý barysynda uzaq merzimdi damýdyń maqsattary oryndalmaıdy», - dedi Tatıana Saveleva.

Munymen qosa ol bıýdjet protsesiniń barlyq kezeńderinde nátıjelerge emes, shyǵystardy qorǵaýǵa ekpin qoıylyp kele jatqanyn sóz etti.

«Atap óter jaıt, Qarjy mınıstrligi, Ulttyq ekonomıka mınıstrligi, Esep komıteti arasyndaǵy aýdıt, tıimdilikti baǵalaý jáne bıýdjettik ınvestıtsııalyq jobalardyń iske asyrylýyna monıtorıng qorytyndylary bóliginde aqparat almasýdaǵy qıyndyqtar kezdesedi», - dep túsindirdi ol.

Foto: migrantinform.ru