Qarjy mınıstrligi: Bıyl saıası reformalarǵa 1 trln teńge jumsalýy múmkin

ASTANA. QazAqparat – Bıylǵy bıýdjettiń shyǵysynda saıası reformalardy iske asyrý sharalarynyń úlesi ulǵaıýy múmkin. Bul jaıynda Qarjy vıtse-mınıstri Tatıana Saveleva vedomstvonyń alqa májilisinde málim etti, dep habarlaıdy QazAqparat tilshisi.

«2023 jylǵa arnalǵan negizgi mindet saıası, konstıtýtsııalyq reformalardy odan ári qarjylaı qamtamasyz etip, ekonomıkany qoldaý bolyp tur», - dedi Tatıana Saveleva.

Sondaı-aq, ol 2024-2026 jyldarǵa arnalǵan bıýdjetti qalyptastyrý kezinde Memleket basshysynyń Joldaýyn, saılaý aldyndaǵy baǵdarlamany, óńirlerge jasaǵan saparlar kezinde týyndaǵan tapsyrmalardy oryndaý, jańa ulttyq jobalar, aýdandar men qalalar ákimderiniń tikeleı saılaýyn ótkizý jónindegi máselelerdiń úlken blogy pysyqtalatynyn aıtty.

«Aldyn ala esep boıynsha bıyl qosymsha 1 trln teńge izdeý talap etilýi múmkin», - dedi vıtse-mınıstr.