Qarjy mınıstri: Jekeshelendiriletin uıymdar men kásiporyndardyń jumysshylary dalada qalmaıdy

ASTANA. Qazaqparat - Jekeshelendiretin uıymdar nemese kásiporyndardy satý kezinde ondaǵy jumysshylar jumystarynan aıyrylmaıdy. Qazaqstan Respýblıkasynyń Qarjy mınıstri Baqyt Sultanov halyqqa esep berý kezdesýinde osylaı dep málim etti, dep habarlaıdy «QazAqparat» HAA tilshisi.

Halyqqa esep berý kezdesýinde Qarjy mınıstrliginiń elektrondy poshtasyna osy maǵynada birneshe suraq kelip túsken. Kópshilikti mazalaǵan suraqqa Qarjy mınıstri kezdesý kezinde jaýap berdi.

«Shynynda da, bul óte mańyzdy suraq. Bizde azamattyq jáne eńbek zańnamasyna sáıkes, jeke menshik ıesiniń aýysýy jumysshylardy jumystan bosatýǵa áser etpeıdi. Buǵan qosa kóp jumysshysy bar áleýmettik nysandardy jekeshelendirý protsesi kezindegi kelisimge jumysshylardyń jumys oryndaryn saqtap qalý týraly mindettemelerdi engizemiz. Sondyqtan, atap ótkenimdeı, jekeshelendirý kezinde áleýmettik sektorǵa basa mańyz beriledi»,  - dedi Qarjy mınıstri.

Qarjy mınıstrliginiń esep berý kezdesýinde Qazaqstannyń ár oblysynan suraqtar kelip tústi. Bir jarym saǵattan asqan kezdesýde Baqyt Sultanov jeke máselege qatysty turǵyndardyń suraqtarymen birge, BAQ ókilderiniń saýaldaryna jaýap berdi.