Qarjy mınıstri páterdi jalǵa alatyndar óz quqyqtaryn qalaı qorǵaý kerektigin aıtty

ASTANA. QazAqparat – Páterdi jalǵa alatyndar kelisimshartqa otyrsa, onda turǵyndardyń quqyqtaryn qorǵaýǵa zańdy negiz bolady. Bul týraly Úkimet otyrysynan keıin Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Páterdi jalǵa alý rásimi zańda kórsetilgen talappen júzege assa, jalǵa beretinder páterdi jalǵa alyp otyrǵan turǵyndardy sebepsiz qýyp jibere almaıdy. Kóp jaǵdaıda turǵyndar aýyzsha kelisim arqyly páterdi jalǵa alady. Bul turǵyda keıin zańmen dáleldeý múmkin emes», - dedi E. Jamýbaev.

Osy oraıda mınıstr páterdi jalǵa alatyndar óz quqyqtaryn qorǵaýy úshin mindetti túrde zańnamada kórsetilgen talappen kelisimshartqa otyrýy kerek ekenin aıtty.

«Birneshe aıǵa kelisimshart bekitse, onda páter ıesi jaldaý qunyn kez kelgen ýaqytta kótere salmaıdy. Zańǵa, sotqa júginýge bolady. Sonymen qatar páterin jalǵa berip otyrǵan adam óziniń tabysy aıasynda salyq tóleýi tıis. Atalǵan shart bolmasa, Memlekettik kirister komıteti birden teksere almaıdy, zańsyzdyqty anyqtaýy qıyn bolady. Sondyqtan barlyq rásim zań boıynsha júrgizilse, adamdardyń quqyǵyn qorǵaýǵa kómektesemiz. Páter ıeleri zańsyz áreketterge jol berse, turǵyndar sotqa júgine alady», - dedi vedomstvo basshysy.

Sonymen qatar mınıstrge jalǵa alynatyn páterlerdiń baǵasyn túsirý múmkindigine qatysty suraq qoıyldy.

«Bul páterdi jalǵa beretin adamdardyń pozıtsııasyna baılanysty. Retteı almaımyz, eger quqyqbuzýshylyq derekteri kezdesse, salyq tólemese, Memlekettik kirister komıteti páter ıelerin teksere alady. Sol jaǵynan kómek kórsete alamyz», - dedi E. Jamaýbaev.