Qarjy mınıstri memlekettik qaryzǵa baılanysty túsinik berdi

NUR-SULTAN. QazAqparat – Parlament palatalarynyń birlesken otyrysynda Qarjy mınıstri Erulan Jamaýbaev memlekettik qaryzǵa qatysty Esep komıtetiniń eskertýine pikir bildirdi, dep habarlaıdy QazAqparat tilshisi.

«Esep komıteti memlekettik boryshtyń ósýine nazar aýdaryp, onyń jalpy ishki ónimge qatynasy 29,4 paıyzǵa jetkenin jáne jańa Bıýdjet saıasaty tujyrymdamasynda belgilengen 27% bolatyn shekteýden asqanyn atap ótti. Rasynda, Tujyrymdamada kórsetilgen 27% Úkimettiń ózi belgilegen ındıkatıvtik kórsetkish, al tujyrymdamanyń ózi qazir ózekti emes. Sondyqtan makroekonomıkalyq jaǵdaıdy jáne ekonomıka damýynyń basqa da parametrlerin eskere otyryp, jańa qujat ázirlenip jatyr», - dedi E. Jamaýbaev Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde.

Onyń aıtýynsha, memlekettik qaryzdyń jalpy ishki ónimge araqatynasy Eýrazııalyq ekonomıkalyq odaq týraly shartta jáne Qazaqstan Respýblıkasynyń 2025 jylǵa deıingi ulttyq damý josparynda belgilengen lımıtten aspaıdy.

«Barlyq boryshtyq ındıkatorlar oryndalýda jáne qaýipsiz deńgeıde saqtalýda», - dedi mınıstr.