Qarjy mınıstri Qazaqstannyń Reseıdegi saýda ókildigi mekemesin taratý sheshimin túsindirdi

ASTANA. QazAqparat – QR Premer-Mınıstriniń orynbasary – Qarjy mınıstri Erulan Jamaýbaev Qazaqstannyń Reseı Federatsııasyndaǵy Saýda ókildigi mekemesin taratý sheshimine qatysty pikir bildirdi, dep habarlaıdy QazAqparat tilshisi.

«Jaqynda osy jaıynda Saýda jáne ıntegratsııa mınıstrligi málimdeme jasady. Bul turǵyda qajet emes qurylymdardy ońtaılandyrý júrip jatyr. Reseımen tyǵyz qarym-qatynas Eýrazııalyq ekonomıkalyq komıssııa aıasynda da bar ekenin eskerý kerek. Ol jaqta Qazaqstannyń ókildigi jetkilikti, ıaǵnı barlyq saladaǵy máseleni retteı alatyn, sonyń ishinde kásipkerlik qyzmette óte saýatty adamdar bar. Sonymen qatar, Elshilik jumys istep tur. Túrli memlekettik qurylymdardan da tıisti ókilder qyzmet etip júr», - dedi E.Jamaýbaev Senatta tilshiler suraǵyna jaýap bere otyryp.

Osy oraıda mınıstr atalǵan ókildikti taratý memlekettik qyzmet qurylymdarynyń jumysyn ońtaılandyrýǵa baǵyttalyp otyrǵanyn naqtalady.

Budan buryn habarlanǵandaı, Qazaqstan Reseı Federatsııasyndaǵy Saýda ókildigi mekemesin taratady. Bul mekeme búginge deıin Saýda jáne ıntegratsııa mınıstrligine qarasty uıym retinde jumys istep kelgen bolatyn.

Foto: t.me/Kzgovernment