Qarjy mınıstri Qazaqstan men Qytaı kedendik málimetteriniń aıyrmashylyǵyna pikir bildirdi

NUR-SULTAN. QazAqparat – Qarjy mınıstri Erulan Jamaýbaev Qazaqstan men Qytaıdyń kedendik málimetteriniń aıyrmashylyǵyna qatysty pikir bildirdi, dep habarlaıdy QazAqparat tilshisi.

«Bul – biz úshin mańyzdy másele. Keden beketterindegi búkil aqparat joldanatyn sıtýatsııalyq ortalyqty da quryp qoıdyq. Oǵan turaqty túrde monıtorıng júrgiziledi. Táýekelderdi basqarý júıesin jetildirip, deklaratsııalanatyn taýarlardyń baǵasyn baqylaý maqsatynda 6 myń baǵalyq ındıkatorlardy engizdik», - dedi Erulan Jamaýbaev halyq aldynda esep berýden keıin OKQ-da uıymdastyrylǵan baspasóz máslıhatynda.

Qarjy mınıstri aıyrmashylyq anyqtalǵan jaǵdaıda kásipkerler qosymsha kedendik bajdy tóleıtinin málim etti.

«Sonymen qatar, qytaı tarapymen eksporttyq-ımporttyq operatsııalar boıynsha aqparattardy almasý formaty týraly kelisimge keldik. Ázirge bul málimetterdiń rastyǵyn áli de anyqtaý kerek. Alaıda ózara almasqan aqparattardyń sapasyn jaqsartý úshin jumys aıasyn keńeıtemiz. Sonymen birge, Qyrǵyz Respýblıkasymen jáne Qytaımen shekaradaǵy ótkizý beketterin barynsha jańǵyrtamyz. Tolyqqandy tsıfrlandyrý shynaıy aqparatty alý úshin aıtarlyqtaı kómek bolary sózsiz», - dedi ol.

Qarjy mınıstri qolǵa alynǵan sharalardyń arqasynda ótken jyly QHR-men kedendik statıstıkadaǵy aıyrmashylyq 53-ten 48 paıyzǵa azaıǵanyn málim etti.