Qarjy mınıstri qaǵazdy qalaı únemdeıdi

ASTANA. QazAqparat -Búginde keden jáne salyq salasyn avtomattandyrý sharalary oıdaǵydaı atqarylyp keledi. Aldaǵy ýaqytta osy jumystyń nátıjesin únemdelgen qaǵazdyń kóleminen baıqaýǵa bolady. Bul týraly búgin Úkimet otyrysynda QR Qarjy mınıstri Baqyt Sultanov aıtty, dep xabarlaıdy QazAqparat tilshisi.

"Aldaǵy ýaqytta "Astana-1" atty aqparattyq júıe iske qosylady. Negizgi maqsat - elektrondy deklaratsııalaýdy engizý. Atalǵan júıeniń arqasynda barlyq kedendik sharalardy avtomattandyryp qana qoımaı, sybaılas jemqorlyq áreketterin de azaıtýǵa bolady. 1 qazannan bastap kedendik tranzıtke qatysty jobanyń alǵashqy kezeńi qolǵa alyndy. Osy ýaqytqa deıin 66 tranzıttik deklaratsııa óńdeldi", - dedi Baqyt Turlyxanuly.

Mınıstrdiń aıtýynsha, kelesi jyldan bastap "Astana-1"-diń qalǵan júıelerin iske qosý josparlanyp otyr. "Jalpy, atalǵan júıeni tolyǵymen iske qosýdyń arqasynda jyldam sheshim qabyldap, kedendik rásimderdi shuǵyl júrgizýge múmkindik bar. Taýar tasymaldaýshylar ýaqytty da, aqshany da únemdeıdi. Óıtkeni deldaldar men brokerlerge biraz qarajat ketedi. Biz bolsaq, ýaqytty jáne 30 tonna qaǵazdy únemdeı alamyz", - dep atap kórsetti Sultanov.

Aıta keteıik, otyrys barysynda QR Premer-Mınıstri Baqytjan Saǵyntaev tondardy tańbalaý sııaqty sharalardy der kezinde qolǵa alý qajettigin atap ótti. Sebebi bıýdjet mıllıardtaǵan salyqtan qaǵylyp otyr.