Qarjy mınıstri Erulan Jamaýbaevty sotqa bergeni týraly aqparat - jalǵan

ASTANA. QazAqparat - Áleýmettik jelilerde QR Qarjy mınıstri Erulan Jamaýbaevty polıtsııa qamaýǵa alyp jatqan sýret tarady. Sýrettiń astynda «Qazaqstan Banki» mınıstrdi sotqa bergeni týraly maqalaǵa silteme berilgen. Munyń bári ótirik.

Bul týraly QazAqparat stopfake.kz saıtyna silteme jasap habarlaıdy.

QR Qarjy mınıstrliginiń baspasóz qyzmeti mınıstrdi sotqa bergeni týraly aqparat pen ony qamaýǵa alýdyń sýretteri feık dep málimdedi.

– Jelide qoǵamdyq tártipti buzýshylarǵa jaǵdaı jasaýǵa, azamattardyń quqyqtary men zańdy múddelerine jáne qoǵam men memlekettiń zańmen qorǵalatyn múddelerine zııan keltirýge baǵyttalǵan shyndyqqa janaspaıtyn, kórineý jalǵan aqparat tarady. Mundaı zańsyz áreketter úshin qylmystyq jaýapkershilik qarastyrylǵan, – dep habarlady vedomstvodan.

Esterińizge sala keteıik, Erulan Jamaýbaevty sotqa berý týraly aqparat buǵan deıin de taraǵan bolatyn. Olardyń feık ekeni anyqtaldy, bul is júzinde krıptovalıýta satatyn bottyń jarnamasy bolyp shyqty.