Qarjy mınıstri bıýdjetke túsetin salyq túsimderiniń qalaı azaıǵanyn aıtyp berdi

NUR-SULTAN. QazAqparat – Qarjy mınıstri Erulan Jamaýbaev Úkimet otyrysynda memlekettik bıýdjettiń osy jyldyń 5 aıynda atqarylý kórsetkishteri týraly baıan etti, dep habarlaıdy QazAqparat tilshisi.

Mınıstrdiń aıtýynsha, memlekettik bıýdjetke 3 trln 420 mlrd teńge somada tabys túsip, jospar 102,9%-ke atqarylǵan. Al respýblıkalyq bıýdjetke 2 trln 111 mlrd teńge kiris kirgen. Jospar 94,4%-ke oryndaldy. Osylaısha transfertterdi eseptemegende kiris boıynsha jospar 125 mlrd teńgege oryndalmaǵan.

«Syrtqy faktorlar aıasynda jospardyń oryndalmaýyna tótenshe jaǵdaı kezeńinde bıznesti qoldaý boıynsha qabyldanǵan sharalar áser etýde. Salyq túsimderiniń azaıýy sáýir aıynan bastalyp mamyr aıynda jalǵasty. «Elektrondyq shot-faktýralar» aqparattyq júıesi derekteri boıynsha, kásipkerlik belsendiliktiń eń qatty tómendeýi - kóterme jáne bólshek saýdaǵa tıesili. Taýar ótkizý aınalymy 2019 jylǵy mamyrmen salystyrǵanda 54%-ke nemese 1,2 trln teńgege tómendegen. Negizgi eksporttyq pozıtsııalar boıynsha baǵa 2019 jyldyń 5 aıymen salystyrǵanda orta eseppen 16,4%-ke jáne jyl basynan beri 13,2%-ke tómendedi. Bul taý-ken óndirý salasynan túsken salyq túsimderine áser etti. Tómendeý - 361 mlrd teńge. Quldyraý qarqyny 43,6% qurady», - dedi ol.