Qarjy mınıstri: Bıýdjet deńgeılerinde kiristiń ósimi bolady
Bul týraly Úkimet otyrysynda QR Qarjy mınıstri Baqyt Sultanov aıtty, dep habarlaıdy QazAqparat.
«Byltyrǵy jyldyń 11 aıynyń qortyndysymen salystyrǵanda kirister 520 mlrd teńgege artyq tústi. Ótken jyldyń osyǵan uqsas kezeńimen salystyrǵanda memlekettik bıýdjet shyǵystarynyń taza ósimi 815 mlrd teńgeni qurady. Bıýdjet qarajatyn ıgerý máselelerin qadaǵalaý barysynda aǵymdaǵy jyldyń ekinshi jartyjyldyǵynan bastap 7 selektorlyq keńes ótkizildi. Osy jumystardyń nátıjesinde shyǵystardyń ıgerý paıyzy joǵary bolady dep kútilýde», - dep atap ótti mınıstr.
B. Sultanovtyń sózinshe, bıýdjettiń atqarylýyn baqylaý barysynda preventıvtik sharalar keńinen qoldanyldy.
«Memlekettik bıýdjetke 6,3 trln teńge kiris (transferttersiz) tústi. Memlekettik bıýdjet boıynsha artyǵymen oryndaý somasy 153 mlrd teńgeni, respýblıkalyq bıýdjet boıynsha - 71 mlrd teńgeni jáne jergilikti bıýdjet boıynsha 82 mlrd teńgeni qurady. Tutastaı alǵanda, memlekettik bıýdjet kiristeri 102,5 paıyzǵa, respýblıkalyq bıýdjet kiristeri - 101,6 paıyzǵa jáne jergilikti bıýdjet kiristeri 104,5 paıyzǵa atqaryldy», - dep naqtylady vedomstvo basshysy.
Belgili bolǵandaı, respýblıkalyq bıýdjetke jyl qorytyndysy boıynsha 4 989,6 mlrd teńge túsýi boljanyp otyr. Bul kórsetkish 100,7 paıyzdy quraıdy, ıaǵnı jospardan 36,8 mlrd teńge artyq bolady.
«Shyǵystar boıynsha oryndalý paıyzy ótken jylǵy kórsetkishterge qaraǵanda jaqsy. Memlekettik bıýdjet boıynsha ótken jyldyń osyndaı kezeńine qaraǵanda 0,7 paıyzǵa, respýblıkalyq jáne jergilikti deńgeıde 0,4 paıyzǵa jaqsy oryndaldy. Jalpy memlekettik bıýdjettiń shyǵystary 97,6 paıyzǵa, respýblıkalyq bıýdjettiń shyǵystary 98,6 paıyzǵa jáne jergilikti bıýdjetterdiń shyǵystary 97,0 paıyzǵa atqaryldy», - dep atap ótti Baqyt Sultanov.