Qarjy mınıstri: Basty memlekettik baǵdarlamalar aldaǵy 4 jylda bıýdjettiń basym baǵyty bolyp qalady

NUR-SULTAN. QazAqparat – Qarjy mınıstri Erulan Jamaýbaev Qazaqstannyń 2020-2024 jyldarǵa arnalǵan bıýdjetiniń ekinshi naqtylaýynyń parametrleri boıynsha ekonomıkany qoldaýǵa 261,7 mlrd teńge bólinetinin málim etti, dep habarlaıdy QazAqparat tilshisi.

«Ekonomıkany qoldaý jáne kúsh qurylymdaryn áleýmettik qamtamasyz etý boıynsha basym shyǵystardy qarjylandyrýǵa 261,7 mlrd teńge kózdelgen. Osy qarajat esebinen óndiristi yntalandyrýǵa baǵyttalǵan birqatar shara men jobany iske asyrý jáne halyqtyń ómir súrý sapasyn jaqsartý men tabysyn ulǵaıtý josparlanýda. Bul rette «Nurly Jol», «Nurly jer», agroónerkásiptik keshendi damytý jáne basqa memlekettik baǵdarlamalardyń is-sharalaryn qarjymen qamtamasyz etý – bıýdjettiń basym baǵyty bolyp qalady», - dedi Erulan Jamaýbaev Úkimet otyrysynda.

Bıýdjetti naqtylaý sheńberinde Prezıdent Jarlyqtaryna sáıkes memlekettik organdar qurý jáne qaıta uıymdastyrý boıynsha qarajatty qaıta bóledi.

«Osy jylǵa arnalǵan respýblıkalyq bıýdjettiń negizgi parametrleri osyndaı. Qabyldanyp jatqan sharalardyń mańyzdylyǵyn eskere otyryp, Zań jobasyn qoldap, daýys berýdi suraımyn», - dep túıdi mınıstr.