Qarjy mınıstri bankrottyq kezinde jalǵyz baspanany qaldyrý máselesi talqylanatynyn aıtty

ASTANA. QazAqparat – Jeke adamdardy bankrot dep jarııalaý rásimi kezinde jalǵyz baspanany qaldyrý máselesi Úkimette jáne Parlamentte talqylanady, dep habarlaıdy QazAqparat tilshisi.

Májilistiń jalpy otyrysynan keıin tilshiler QR Premer-Mınıstriniń orynbasary-Qarjy mınıstri Erulan Jamaýbaevtan kepilge qoıylǵan jalǵyz baspanany alyp qoıýǵa tyıym salý múmkindigine qatysty suraq qoıdy.

«Bul kúrdeli másele bolyp tur. Sondyqtan ony áli de talqylaımyz. Zań jobasyn ekinshi oqylymǵa deıin talqylaý kezinde ortaq pikirge, kelisimge kelýimiz kerek. Bul rette artyqshylyǵy men kemshiligi de bar. Negizi, ár azamat baspanaly bolýy kerek», - dedi E.Jamaýbaev.

Búgin Májilistiń jalpy otyrysyda depýtat Azat Perýashev jalǵyz baspanany alyp qoıýǵa tyıym salý kerek ekenin aıtty.

Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» zań jobasy men ilespe qujattar birinshi oqylymda maquldandy.

Somasy 4,9 mln teńgeden asatyn qaryzdar boıynsha jáne basqa da bereshek túrleri boıynsha azamattar sot bankrottyǵyna júgine alady. Bul rásim barysynda boryshkerdiń múlki satylady. Túsken qarajat belgilengen kezekpen kredıtorlar aldyndaǵy qaryzdardy óteýge jumsalady. Eger jalǵyz turǵyn úı kepil zaty bolyp tabylsa, onda kredıtor ony sottyń bankrottyq rásimi kezinde alýǵa quqyly. Jalǵyz baspana kepil bolmasa, kredıtorlar ony talap ete almaıdy.