Qarjylyq monıtorıng agenttigi «The Finiko» pıramıdasynan zardap shekkenderdi izdestirýde

<p>QR Qarjylyq monıtorıng agenttiginiń Jambyl oblysy boıynsha departamenti Taraz qalasynyń aýmaǵynda &laquo;The Finiko&raquo; qarjy (ınvestıtsııalyq) pıramıdasynyń bólimshesin qurý jáne ony basqarý faktisin tergep jatyr. <a href="https://kaz.inform.kz/" target="_blank" rel="noopener">QazAqparat</a> bul týraly QMA resmı ókili Álibek Ábdilovke silteme jasap habarlaıdy.</p>

Qarjy pıramıdasyn uıymdastyrýshylar «Thefiniko.SOM» baǵdarlamasy arqyly óńir turǵyndaryn salymshy (ınvestor) retinde tartqan. Olardyń qarajatyna (krıptovalıýtasyna) álemdik bırjalarda oıdan shyǵarylǵan treıdıngti júzege asyrǵan. Kiris keıinnen qatysýshylar men uıymdastyrýshylar arasynda bólinetini aıtylǵan.

«2021 jylǵy shildede QR Qarjy naryǵyn retteý jáne damytý agenttigi «The Finiko» jobasyn resmı túrde qarjy pıramıdasy dep tanydy.

Qazirgi ýaqytta qylmystyq is sheńberinde birqatar tergeý amaldary men tıisti saraptamalar júrgizilip jatyr. Onyń nátıjesimen qylmystyq is boıynsha protsestik sheshim qabyldanatyn bolady.

QR QPK-niń 201-babyna sáıkes ózge de aqparat jarııalaýǵa jatpaıdy», – delingen málimette.

«The Finiko» qarjy pıramıdasynyń qyzmetinen zardap shekkenderden Jambyl oblysy boıynsha Ekonomıkalyq tergep-tekserý departamentine habarlasý suralyp otyr.