Qarjyger júıelik taldaýǵa qabiletti bolýy kerek — Maıgúl Qudaıbergenova

<p>Búgin&nbsp;&mdash; Qarjygerler kúni. 1993 jyldyń 15 qarashasynda el&nbsp;azamattary alǵash ret memlekettik valıýta&nbsp;&mdash; teńgeniń alǵashqy banknottaryn qoldaryna aldy. Táýelsizdik jyldarynda valıýtanyń nyǵaıýyna qarjygerlerdiń qosqan úlesi kóp. QR PІB &laquo;Memlekettik rezıdentsııalar dırektsııasy&raquo; RMK dırektorynyń orynbasary Maıgúl Qudaıbergenova <a href="Kazinform" target="_blank" rel="noopener">Kazinform</a> tilshisine atalǵan mamandyqtyń qyr-syry týraly aıtyp berdi.&nbsp;</p>

— Qarjyger mamandyǵyn tańdaýyńyzdyń syry nede? 

— Men negizi dáriger bolýdy armandadym. Biraq toqsanynshy jyldardyń basynda elimizde ekonomıka jáne býhgalterlik esep salalary keńinen tanymal boldy. Mektep qabyrǵasynda júrgenimde esepke jaqsy bolǵanymnan keıin oqý bitirerde ekonomıka fakýltetine túsýge sheshim qabyldadym. Býhgalter bolýǵa degen qyzyǵýshylyǵym artty. Degenmen medıtsına salasyna keldim, munda ekonomıst retinde jumys istedim. Biraz ýaqyt jekemenshik medıtsına salasynda júrgennen keıin Prezıdent ákimshiliginiń aýrýhanasynan shaqyrtý tústi, onda 20 jyl eńbek ettim. Dál osy jerde men barlyq kezeńinen óttim dese de bolady. Ekonomıst, aǵa ekonomıst, bas ekonomıst jáne dırektordyń orynbasary qyzmetterin atqardym. 

— QR PІB «Memlekettik rezıdentsııalar dırektsııasy» RMK-daǵy jumysyńyz týraly aıtyp berseńiz. 

— Qarjylyq-ekonomıkalyq zertteýlerge sáıkes kásiporynnyń qyzmetin úılestirý, basqarý jáne baqylaý, materıaldyq, eńbek jáne qarjylyq resýrstardy utymdy jáne tıimdi paıdalaný, ekonomıkalyq qaýipsizdikti qamtamasyz etý, qarjylyq táýekelderdi azaıtý, kásiporynnyń qarjylyq turaqtylyǵyn qamtamasyz etý jáne t.b mindetterdi qatar alyp júrdim. 

— Sizdiń bastamańyzben jaqsy qarjylyq nátıjelerge qol jetkizgen joba nemese bastama boldy ma? 

— Qarjyger retindegi eńbek tájirıbemniń basym bóligi medıtsınalyq ortalyqta ótkendikten, kóptegen joba patsıentterdi dıagnostıkalaý men emdeýdiń jańa tehnologııalaryn engizýge qatysty ekenin aıta keteıin. ISO jáne JCI standarttary boıynsha akkredıtteý, ǵylymı jobalarǵa qatysý, sonymen qatar 2015 jyly qýattylyǵy 10 ese, jumysshylar sany 4 ese ulǵaıtylǵan PІB aýrýhanasynyń jańa ǵımaratyn iske qosý eń úlken joba boldy. Bul rette kásiporynda qarjylyq turaqtylyq jáne tsıfrlyq tehnologııalardy paıdalana otyryp aktıvterdi esepke alý jaqsy jolǵa qoıylǵan.

Budan basqa, men postkeńestik keńistikte balamasy joq, onkologııalyq saqtyqpen jáne aýrýlarmen aýyratyn naýqastardy dıagnostıkalaý úshin qajetti 9 radıoaktıvti farmatsevtıkalyq preparattardy óndirý qýaty bar Qazaqstan Respýblıkasy Prezıdentiniń Іs Basqarmasy Medıtsınalyq ortalyǵy aýrýhanasynyń «tsıklotrondy-óndiristik kesheni» jobasyn iske asyrýǵa qatystym. Sondaı-aq PІB júıesindegi kásiporyndar úshin tsıfrlandyrý jobalaryn qalyptastyrýǵa jáne iske qosýǵa atsalystym. Bul is meni qatty qyzyqtyrdy. 

— Qarjyger men ekonomısttiń aıyrmashylyǵy nede? 

— Basqarý qyzmetindegi qarjygerdiń qyzmeti ártúrli mindetterdi sheshý arqyly áldeqaıda aýqymdy ári túrli naryqtyq quraldardy qoldaný arqyly júzege asyrylady. Qarjyger júıelik taldaýǵa jáne málimetter massıvi negizinde boljam jasaýǵa qabiletti. Munyń bári qarjylyq shyǵyndardy azaıtady nemese joıady. Al, ekonomıst bıýdjetti josparlaıdy, ekonomıkalyq qyzmetti taldaıdy, normada belgilengen shyǵyndardyń saqtalýyn baqylaıdy, óndiristik qýattardy eskere otyryp esepteýler júrgizedi — operatsııalyq shyǵyndardy azaıtýǵa áreket etedi. 

— Qarjymen jumys isteý úshin neni jaqsy meńgerý kerek? 

— Strategııalyq oılaý, basqarýshylyq quzyret jáne kásibı bilim: negizgi qarjylyq kórsetkishter, qarjylyq taldaý, bıýdjettik josparlaý, býhgalterlik jáne basqarýshylyq esep negizderi, qarjy jáne salyqtar salasyndaǵy zańnama, qarjylyq qujattamany jasaý tártibi, ekonomıkalyq taldaý jáne táýekelderdi baǵalaý daǵdylary, bıznes-josparlaý, qarjylandyrý kózderi boıynsha aqsha aǵyndaryn basqarý daǵdylaryn bilý mańyzdy. Ózgeristerge tez ıkemdelý kerek. Bul salada júrgen kez kelgen maman izdenisti toqtatpaýy qajet. Óıtkeni qarjy mamandarynda belgisizdik jaǵdaıynda táýekelge baryp, tez sheshim qabyldaıtyn sátter kóp bolady. Sonymen qatar mansap jolynyń kez kelgen kezeńinde atalǵan mamandyq ıeleri shyǵyndardy esepke alý men basqarýshylyq eseptiń zamanaýı ádisterin qoldana otyryp aqparatty basqarýdy daǵdyǵa aınadyra bilýi tıis. 

– Áńgimeńizge rahmet!