Qarjy pıramıdasyn basqardy degen kúdikke ilingen áıelge halyqaralyq izdeý jarııalandy

<p>ASTANA. KAZINFORM - Qarjylyq monıtorıng agenttigi qarjy pıramıdasynyń qurylymdyq bólimshesin basqardy degen kúdikke ilingen Dana Anvarqyzy Batyrshınaǵa halyqaralyq izdeý jarııalaǵanyn málimdedi.</p>

Dana Anvarqyzy Batyrshına 1976 jylǵy 26 qyrkúıekte týǵan. Ózbekstan, Tashkent qalasynyń týmasy. Atalǵan tulǵa 2020 jyldyń shildesinen 2021 jyldyń shildesine deıin «Thefiniko» qarjy pıramıdasynyń qurylymdyq bólimshesin basqardy degen kúdikke ilingen. Ol azamattardan jalpy somasy 65,9 mln teńge jáne 206,5 myń AQSh dollaryn zańsyz jymqyrǵan.

Atap aıtqanda, «Thefiniko» kompanııasy saýda jáne ınvestıtsııa platformasy bolyp tabylmaıdy jáne álemdik bırjalardyń eshqaısysynda tirkelmegen.

«Eger siz izdestirilip jatqan tulǵanyń ornalasqan jeri týraly qandaı da bir aqparat bilseńiz, myna telefon nómirlerine habarlasýyńyzdy suraımyz:
[phone] - izdeý boıynsha, [phone] - kezekshi bólim. Syıaqy men anonımdikke kepil beremiz», - delingen habarlamada.

Buǵan deıin Óskemende qarjy pıramıdasyn quryp, halyqty 42 mln teńge shyǵynǵa batyrǵan áıel sottalǵanyn jazǵan bolatynbyz.