Qarjy mınıstrligi syrtqy qaryzǵa qatysty túsinik berdi

<p>ASTANA. KAZINFORM &ndash; Qarjy vıtse-mınıstri Erjan Birjanov elimizdiń syrtqy qaryzyna qatysty túsinik berdi.</p>

«Biz syrtqy faktorlarǵa kóbirek táýeldimiz jáne negizinen shıkizat jiberemiz. Aıtalyq, munaı, bıyl óndiris kóleminiń azaıýy baıqaldy. Ekinshiden, taý-ken metallýrgııa kesheni ónimderi boıynsha aıtarlyqtaı ósim bolǵan joq, eksporttalatyn birqatar taýar boıynsha baǵanyń tómendeýi baıqaldy. Árıne, munyń bári bıýdjet túsimderine áser etti, sebebi túsim azaıdy», - dep túsindirdi Erjan Birjanov Májilis qabyrǵasynda BAQ ókilderiniń saýalyna jaýap bere turyp. 

Sondaı-aq, vıtse-mınıstr kóktemgi sý tasqynyna bıýdjetke salmaq túsirgenin aıtty. 

«Tasqyn bolatyny josparda joǵy anyq. Turǵyn úımen qamtamasyz etý máseleniń bireýi ǵana. Osy oraıda bıýdjetten rezervter arqyly ınfraqurylym qarjylandyryldy jáne qalpyna keltirildi. Turǵyn úıden bólek, tirshilikti qamtamasyz etip, obektilerdi qalpyna keltirý máselesi bar, bul da memlekettik bıýdjetke salmaq túsirdi. Barlyq kovenant, qaryzdar boıynsha normalar saqtalady jáne olar negizinen ınfraqurylymdyq jobalarǵa qarajat jumsalady. Bul bolashaqta qosymsha jumys oryndaryn ashýǵa jáne bıýdjetti tolyqtyrýdy ákeledi degen sóz. Biz búgingi kúnmen ómir súrmeýimiz kerek, sondyqtan mundaı mehanızmder qabyldanady», - deıdi Qarjy mınıstriniń orynbasary. 

Aıta keteıik, Májilistiń qaraýyna «Qazaqstan men Azııa Damý Banki arasyndaǵy qaryz týraly kelisimdi ratıfıkatsııalaý týraly» zań jobasy jáne «Qazaqstan men Azııa Infraqurylymdyq Investıtsııalar Banki arasyndaǵy qaryz týraly kelisimdi ratıfıkatsııalaý týraly» zań jobasy kelip tústi. Osy eki qujat boıynsha jalpy qaryz kólemi 105 mlrd ıendi quraıdy.