Qarjy mınıstrligi 3,5 trln teńgeniń strestik aktıvterin ekonomıkaǵa tartý tetikterin usyndy
«12 qyrkúıekte Májiliste bıýdjet jobasy tynystyrylyp, onda Ulttyq qordan qarajatty alý jáne respýblıkalyq bıýdjettiń kiris bóliginiń toltyrylýyna baılanysty depýtattardyń tarapynan oryndy syn aıtyldy. Jergilikti bıýdjetterdiń kiristeri asyra oryndalǵanymen respýblıkalyq bıýdjettiń túsimi qubylmalyǵy joǵary taý-ken jáne munaı-gaz ónimderiniń álemdik baǵasyna qatty táýeldi. Depýtattar salyq salynatyn bazany ulǵaıtýdy, bızneske qoldaýdy arttyrý boıynsha jumysty jedeldetýdi talap etti. Osyndaı jedel amaldardyń biri – «toqtaý salynǵan» aktıvterdi tartý. Bul – bankter men MQU-nyń problemalyq qaryzdary boıynsha jeke tulǵalar men bıznestiń kepilzattary. Bul aktıvterdiń quny túrli baǵalaýlar boıynsha 3-3,5 trln teńgeniń aralyǵynda», - dep túsindirdi mınıstrlik ókilderi.
Quzyrly organ strestik aktıvterdi ótkizý úshin e-Qazyna.kz platformasynda jolǵa qoıylǵan Talaptar jańa servısin paıdalanýdy usynyp otyr. Munda 10 jyldan beri jekeshelendirý aıasynda respýblıkalyq jáne kommýnaldy menshik, holdıngter men bankrottardyń aktıvteri saýdalanyp, sondaı-aq tárkilengen múlik pen ańshylyq alqaptary men balyq sharýashylyǵy sý aıdyndaryna qyzmetpen aınalysýǵa quqyqtar beriledi.
Sonymen qatar osy platformada baılanys operatorlary arasynda jıilikti bólý (5G), kómirsýtekter men qatty paıdaly qazbalardy barlaý, óndirý quqyǵyna arnalǵan saýda-sattyq ótkiziledi, sondaı-aq keń taralǵan paıdaly qazbalar boıynsha da saýdany ótkizýdi bastaý josparlanyp otyr.
«Buǵan qajetti barlyq resýrs bar jáne tsıfrly júıe QR UQK Memlekettik tehnıkalyq qyzmetiniń aqparattyq qaýipsizdik talaptaryna tolyǵymen saı. Sondaı-aq elektrondy saýda-sattyqty ótkizý boıynsha jınaqtalǵan tájirıbe atalǵan platformanyń ashyqtyǵy men turaqtylyǵyn qamtamasyz etedi. Búginde osy júıede 330 myńǵa jýyq paıdalanýshy tirkelgen. Túrli aqparattyq júıeler jáne derekqorlarmen 30-dan astam ıntegratsııa júzege asyryldy», - dep atap ótedi mınıstrlikten.