Karzaı Qazaqstanǵa 2 mln dollar kólemindegi kómegi úshin alǵys aıtty

ASTANA. QazAqparat - Búgin Astanada QR Syrtqy ister mınıstrligi men Aýǵanstan syrtqy ister vedomstvosy arasyndaǵy kezekti konsýltatsııalar bastaldy. Islam Respýblıkasynyń delegatsııasyn syrtqy ister mınıstriniń orynbasary Hekmat Halıl Karzaı bastap keldi, dep xabarlaıdy QazAqparat tilshisi.

Óz sózinde Karzaı myrza Qazaqstannyń BUU Qaýipsizdik keńesiniń turaqty emes múshesi bolyp saılanǵanymen quttyqtap, Aýǵanstannyń esh oılanbastan Qazaqstanǵa daýys bergenin jetkizdi. Aldaǵy ýaqytta elimizdiń osy qyzmettegi bastamalaryna qoldaý bildiretinin de atap ótti. Osydan keıin mártebeli meıman qazaq xalqynyń Aýǵanstanǵa bergen kómegi úshin alǵys aıtty.

«Aýǵan eli qıynshylyq kórgende Sizder demeý bolyp, san alýan problemalardy sheshýge kómek berdińizder. Sizder aýǵan jastaryna myńdaǵan stıpendııa taǵaıyndap, Qazaqstannyń mańdaıaldy joǵary oqý oryndarynda bilim alýǵa jaǵdaı jasadyńyzdar. Olar genetıka jáne taǵy basqa ǵylym salalary boıynsha oqyp jatyr. Dál osy jastar erteń óz elin alǵa súıreıdi. Biz ony jaqsy túsinemiz. Sosyn 2 mln. dollar ınvestıtsııa quıǵanyńyz úshin de alǵysymyz sheksiz. Osy aqshanyń arqasynda biraz másele sheshildi», - dedi Karzaı myrza.

Aýǵan delegatsııasyn qabyldaǵan QR Syrtqy ister vıtse-mınıstri Aqylbek Qamaldınov Qazaqstanda atqarylyp jatqan sharalarǵa qysqasha sholý jasap, eki el arasyndaǵy baılanystardyń nyǵaıyp kele jatqanyn tilge tıek etti. Konsýltatsııa kezinde taraptar prezıdentter deńgeıinde qolǵa alynǵan sharalardy pysyqtap, aldaǵy josparlardy talqylap shyqty.