«Káriz sýyn iship otyr»: Mańǵystaýda bir aýyl 9 jyl jerasty sýynan japa shegip keledi
Jerasty sýlary kóterilgende turǵyn úılerdiń káriz qudyǵy tolyp, las sý aýlaǵa, kóshelerge jaıylady. Qudyqtaǵy aýyz sý da lastanady. Qaltasy kóteretin turǵyndar sýdy satyp alady. Al, shamasy jetpegender las sýdy súzip ishýge májbúr.
— Men keshe árqaısysy 5 myń teńgeden 5 vodovoz sý tarttyrdym. Ákimdiktiń kómegimen 8 kýbtyq 3 vodovoz sý shyǵaryldy. 3 saǵattan keıin aýlam qaıta toldy. Úıdiń asty tolǵan sý. Edenniń aǵashyn kóterseń sý kórinedi. Las sý qudyqtaǵy aýyz sýmen aralasyp ketti. Endi amal joq, 5 lıtrlikpen sýdy satyp alyp iship otyrmyz, — deıdi «Kóktem» shaǵyn aýdanynyń turǵyny Áset Sharmanov.
Las sýdyń ortasynda turý qıyn bolǵasyn keı turǵyndar úılerin jaýyp, páter jaldap ketken. Endi biri amalsyzdan turyp jatyr.
— Úıimdi tastaýǵa qımaımyn. Ári jalǵyz baspanam. Mańdaı terimizben turǵyzyp edik. Endi mine, aýla toly sý. Uıat ta bolsa aıtaıyn, dárethanaǵa barý úshin aıaǵymyzǵa sý etik kıip, kezekpen baramyz. Sý úıge de kirip jatyr. Qabyrǵalardyń bári túsip, úgitilip tur, — deıdi Nurgúl Nurmanova.
Turǵyndardyń aıtýynsha, aýylda drenajdyq júıe de joq. Ákimdik sorǵy qoıǵan, biraq onyń qubyry jińishke. Qoqys jınalyp qalady da, sý ótpeıdi. Al, aýdan ákimdiginiń málimetine súıensek, Atameken selolyq okrýginde 8 drenajdyq júıe jumys istep tur. Biraq, jańbyr kóp jaýǵanda olardyń kúshi jetpeıdi. Sondyqtan taǵy 4-eýine qarjy bólingen.
— Aldaǵy ýaqytta biz káriz qubyryn júrgizýdi josparlap otyrmyz. Kanalızatsııa drenajymen birge degen jobalyq-smetalyq qujattarǵa byltyr qarajat bólindi. Joba ázir. Memlekettik saraptamaǵa tapsyryldy. Oń qorytyndysyn alsaq, qurylys jumystaryn júrgizýge bıýdjettik ótinim beremiz, — deıdi Munaıly aýdany ákiminiń orynbasary Nurhan Mustafaev.
Aýdan basshylyǵynyń aıtýynsha, drenajdyq júıe jobasy budan 9 jyl buryn, ıaǵnı másele týyndaǵanda-aq ázirlenipti. Alaıda qarjy bólinbegendikten, júzege aspaı qalǵan.