Qaryzdy kóbeıte bermeı, qolda bar qarjyny durys paıdalaný qajet – Áshimbaev
«Qazir bárimiz «Jańa Qazaqstandy» qurýǵa belsendi kirisip jatyrmyz. Bul jolda barlyq salada jańa qadam, tyń kózqaras qajet ekeni anyq. Sonyń ishinde respýblıkalyq bıýdjetti qalyptastyrýda da jańa tásilder kerek dep esepteımiz. Prezıdentimiz aıtqandaı, Jańa Qazaqstan degenimiz – eń aldymen ádiletti Qazaqstan. Sol sebepti bıýdjetti qalyptastyrý ashyq, ádil, tıimdi júrgizilýge tıis. Bul – halyqtyń talaby jáne Memleket basshysynyń bizge júktep otyrǵan basty mindeti», - dedi M. Áshimbaev Senattyń búgingi otyrysynda.
Osy rette bólinetin qarjynyń jáne josparlanǵan jumystyń naqty nátıje berýi mańyzdy.
«Respýblıkalyq bıýdjettiń ár teńgesi ornymen bólinip, tıimdi jumsalýǵa tıis. Ulttyq qordyń da qarjysyn durys paıdalanǵan jón. Bıýdjet defıtsıtin syrttan qaryz alyp qarjylandyrý máselesin de pysyqtaǵan abzal. Qaryzdy kóbeıte bermeı, bar qarajatty durys paıdalaný qajet. Sondyqtan bıýdjetti qaraǵan kezde nátıje bermeıtin naýqandyq sharalardy qarjylandyrýǵa jol berilmeýi kerek. Bul máseleni depýttar baqylaýda ustaıtyn bolady. Qazir búkil álem tyǵyryqqa tirelip tur. Mundaı sátte bar qarjyny ońdy-soldy shasha bermeı, respýblıkalyq bıýdjettiń tıimdiligin arttyrýymyz kerek. Úkimet múshelerinen, ákimder men basqa da laýazymdy tulǵalardan aldaǵy ýaqytta osy máselelerdi eskerýdi suraımyz», - dedi Senat tóraǵasy.
Aıta keteıik, búgin Senat otyrysynda depýtattar «Qazaqstan Respýblıkasynyń Ulttyq qorynan 2022–2024 jyldarǵa arnalǵan kepildendirilgen transfert týraly» QR Zańyna ózgeris engizý týraly» jáne «2022–2024 jyldarǵa arnalǵan respýblıkalyq bıýdjet týraly» QR zańyna ózgerister men tolyqtyrýlar engizý týraly» zańdardy qarap, maquldady.
Bul túzetýler aıasynda sáýir aıynan bastap zeınetaqy men áleýmettik tólemder qosymsha 4 paıyzǵa artady. Jalpy zeınetaqynyń ortasha mólsheri ótken jylmen salystyrǵanda 11 paıyzǵa ósedi.