Qaryz kúlip baryp, jylap qaıtady - baspasózge sholý
***
«Sheteldik kompanııalardyń 134 bólimshesi 6 mıllıard teńgedeı qaryz», - dep jazady « Aıqyn » búgingi sanyndaǵy « Qaryz kúlip baryp, jylap qaıtady » atty maqalasynda. Basylymnyń aıtýynsha, bul týraly qarjy vıtse-mınıstri Ardaq Teńgebaev senattaǵy «Salyqtyq ister jónindegi ózara ákimshilik kómek týraly Konventsııaǵa ózgertýler engizý týraly hattamanyń engizgen túzetýlerine qatysty salyqtyq ister jónindegi ózara ákimshilik kómek týraly Konventsııasyn ratıfıkatsııalaý týraly» zań jobasy jónindegi qarjy jáne bıýdjet komıtetiniń otyrysy barysynda aıtqan.
«Atalǵan konventsııany ratıfıkatsııalaǵannan keıin biz basqa elderdegi áriptesterimizge Qazaqstanda jumys jasaıtyn sheteldik kompanııalar fılıaldarynyń sol qaryzdaryn óndirýde bizge kómek kórsetetýin surap júginetin bolamyz dep baǵamdaımyz», - dedi Ardaq Teńgebaev.
Onyń aıtýynsha, atalmysh konventsııa málimettermen óte aıqyn almasýdy jónge salýǵa, basqa elderdiń mınıstrlikterimen birlesken tekserister ótkizýge múmkindik beredi dep kózdelýde.
Atap kórsetilgendeı, salyqtyq ister jónindegi ózara ákimshilik kómek týraly konventsııaǵa qoldy 1988 jyldyń 25 qańtarynda Strasbýrgte Eýropa Keńesi men ekonomıkalyq yntymaqtastyq jáne Damý Uıymy qoıǵan.
Búginde Qazaqstan eseleı salyq salýdan qashqaqtaý men alty elmen aqparat almasý týraly kelisim jónindegi 46 ekijaqty konventsııalardyń negizinde sheteldik memlekettermen salyqtyq aqparat almasady. Jas rejıcser Ádilhan Erjanovtyń «Úkili kámshat» fılmi qazaq qoǵamynyń shyndyǵyn sýrettegen týyndy bolyp tabylady. Oqıǵa aýylǵa kóship kelgen otbasy men jergilikti turǵyndar arasyndaǵy qatynasqa qurylǵan, dep jazady «Aıqyn» búgingi sanyndaǵy « Úkili kám sh at » álemdi áldılep aldy » atty maqalasynda.
Basylymnyń jazýynsha, Djon men inisi Erbol, qaryndasy Álııa Almatydaǵy úılerinen aıyrylyp qalady.
Analary alystaǵy bir aýylda balalaryna muraǵa úı qaldyrǵan. Alaıda olarǵa aýylda taǵdyr tosyn syılar daıyndap qoıǵan edi. Jergilikti ýchaskelik polıtseıdiń týysy Juba bulardyń úıine ornalasyp alady. Aǵaıyndylar zań júzinde úılerin qaıtaryp alýǵa tyrysqanymen, aýyl adamdary zańǵa bas ımeıtin bolyp shyqty. Sebebi turǵyndardyń óz zańy, ómir súrý qaǵıdalary bolatyn. Rejısser fılmniń ıdeıasyn tek sıýjet arqyly jetkizýge tyryspaǵan, shynaıy ómir kórinisteri arqyly jetkizbek bolǵan. Alys qyrdaǵy bir aýyldaǵy eki otbasynyń úıge talas-tartysyn ashý barysynda rejısser sol aýyl turǵyndarynyń qatygez ómir salty, ózgelerdiń taǵdyryna nemquraıly kózqarasyn, bıliktiń ádiletsizdigin jaqsy kórsetken. Budan neni baıqaýǵa bolady? Qoǵamnyń áleýmettik kórinisi, adamdar arasyndaǵy teńsizdik, zańnyń óreskel buzylýy, jalpy, qoǵamnyń aşy shyndyǵy...
Kınosynshylar týyndyǵa «komedııalyq týyndy» dep baǵa bergen edi. Alaıda janrlyq turǵydan «dramalyq týyndy» dep baǵalaýǵa bolady. Fılmdegi qoǵamnyń kórinisi, sábı qýanyshy tereń fılosofııalyq oı túıýge ıtermeleıdi, deıdi basylym.
Bul týyndy 14-25 mamyr aralyǵynda ótken halyqaralyq Kann kınofestıvalinde álem jurtshylyǵyna usynyldy. Fılm kórermenderdiń ystyq yqylasyna ıe boldy. Kórermender oryndarynan turyp qoshemet kórsetti. Kınofestıvalden soń jas rejısserimizdi Akı Kaýrısmıakı, Djım Djarmýsh sııaqty shoqtyǵy bıik rejısserlermen teńestire bastady. Brıtandyq belgili rejısserlerdiń biri týyndyny eń úzdik 10 fılmniń tizimine engizdi.
Fılm Toronto, Slovakııa, Rossııa, Sıngapýr, Gollandııa, Ońtústik Koreıa, Kanada, Frantsııa, Polsha elderindegi kınoteatrlarda kórsetildi. Edınbýrgte kınofestıvaldiń de baǵdarlamasyna endi. 19-28 maýsym aralyǵynda Máskeýde ótken halyqaralyq kınofestıvalde de qalyń kórermenderdiń júreginen jol tapty. «Kınoshok» kınofestıvalinde kınosynshylar men kınotanýshylardyń arnaıy usynǵan «Slon» marapatyna ıe boldy.
«Úkili kámshat» fılmi azıattardyń Oskar júldesine teń sanalatyn jyl saıyn ótetin «Asia Pasific Screen Awards» premııasyna eki birdeı nomınatsııa boıynsha usynyldy. Ol nomınatsııalar: «Eń úzdik fılm» jáne «Eń úzdik operator». «Asia Pasific Screen Awards» jeńimpazdaryn halyqaralyq ádilqazy músheleri anyqtaıtyn bolady. Jeńimpazdardy saltanatty marapattaý 11 jeltoqsanda Avstralııanyń Brısben qalasynda ótedi.
***
« Egemen Qazaqstan » basylymynyń búgingi sanynda « Aıtystyń (iTys) sóz dodasy » degen taqyrypta Memlekettik tildi damytý qorynyń dırektory Azat Sháýeevpen bolǵan suhbat jarııalanyp otyr. Onda ol jaqynda tusaýkeseri bolǵan «Aıtys» ( iTys) atty otandyq messendjer týraly jan-jaqty baıandaıdy.
«Barshamyzǵa belgili, qazirgi tańda búkilálemdik IT salasy qarqyndy damý ústinde. Kúnnen-kúnge jańa ónimder men ozyq tehnologııalar sany artýda. Qazaqstannyń da bul baǵyttaǵy áleýeti mol dep esepteýge bolady. «Kózdi ashyp-jumǵansha jyldam habar alǵyzýǵa» múmkindik beretin IT-tehnologııa boıynsha otandyq ónimderdi kóbeıtý, solar arqyly memlekettik tildi nasıhattaý, qazaqsha hat-habar almasqysy keletin adamdardyń erkindigine jaǵdaı týǵyzý - bizdiń kózdegen basty maqsatymyz deýge bolady. Iá, maqsat-mindetimiz aıqyn. Endigi sharýa - osy iske qolynan is keletin azamattardy jumyldyrý. Sondyqtan, jobany júzege asyrýǵa elimizge belgili akter, prodıýser Dáýit Shaıhıslamov bastaǵan oıy utqyr, jańashyl jastardy tarttyq. Baǵdarlama jasaýshy kásibı tehnıkter de, kreatıvti sýretshiler de, dızaınerler de - bári de óz mamandarymyz. Bul ónim - solardyń jumyla atqarǵan eńbeginiń nátıjesi. Osy ýaqyt ishindegi kózim jetken qýantarlyq jaıt - óz aramyzda shyn máninde daryndy, jańashyl, ozyq oıly, otansúıgish jastar qatarynyń kóbeıip kele jatqandyǵy. Sóıtip, bir jyldyń ishinde osy jobany - iTys-ty jasap shyǵardyq. Qazaqsha, oryssha jáne aǵylshynsha hat-habar almasýǵa múmkindik beretin, qyzyqty ári ulttyq naqyshta ázirlengen, yńǵaıly jáne qoljetimdi messendjer dúnıege keldi», - deıdi A.Sháýeev.
Dýbaı qalasynda Quran Kárimniń álemde tuńǵysh ret shópten jasalǵan nusqasy tabyldy, dep jazady «Egemen Qazaqstan» búgingi sanyndaǵy « Quran kitabyn shópten jasaǵan » atty maqalasynda. Basylymnyń atap ótýinshe, salmaǵy 7,5 kılo tartatyn bul kitap basylǵan ýaqytynan keıin araǵa otyz jyl salyp adamzat nazaryna iligip otyrǵan kórinedi.
Maqalada kórsetilgendeı, ony jasaýǵa túrik dárigeri Hakım Hamdı Taher 22 jylyn arnaǵan. Terapevtik qasıetteri bar kitap «ıýnanı» medıtsına júıesine sáıkes, «joǵary kontsentratty» shóp qospalarynan turady. Onyń adam densaýlyǵyna tıgizer paıdasy da anyqtalǵan.