Qarýly Kúshterge 6700-den astam qazaqstandyq shaqyrylady

NUR-SULTAN. QazAqparat - Elimizde 17 myńnan astam adamdy áskerge shaqyrý josparlanýda. Onyń ishinde 6700 jas sarbaz Qarýly Kúshterge, qalǵandary Shekara qyzmeti men Ulttyq ulanǵa qyzmet etýge attanbaq, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Azamattardy merzimdi áskerı qyzmetke shaqyrýdy júrgizý medıtsınalyq komıssııalar men jergilikti atqarýshy organdarǵa júktelgen.

Áskerge shaqyrylýshylardy irikteý men bólý barysynda densaýlyq jaǵdaıy, olardyń áskerge shaqyrylǵanǵa deıin alǵan mamandyqtary eskeriledi. Fızıkalyq daıyndyǵy joǵary, moraldyq jáne psıhologııalyq turǵydan tózimdi jastar Teńiz jaıaý áskerleriniń, Desanttyq-shabýyldaýshy áskerleri men Áskerı-teńiz kúshteriniń bólimshelerine bara alady.

2020 jylǵy kóktemgi áskerge shaqyrýdy taldaý derekteri boıynsha áskerge shaqyrylýshylardyń 50% orta bilimi, jas býyndardyń 47% tehnıkalyq jáne kásiptik, 3% joǵary bilimi bar. Bul rette qazirgi áskerge shaqyrylýshylardyń arasynda Qorǵanys mınıstrliginiń áskerı-tehnıkalyq mektebiniń túlekteri de az emes.

Koronavırýstyq ınfektsııanyń taralýynyń aldyn alý sharalaryn kúsheıtý maqsatynda jınaqtaý pýnktterinde medıtsınalyq beketter ornalastyrylǵan. Sonymen qatar, oblystyq medıtsınalyq komıssııalardyń quramyna ınfektsıonıst dárigerler engizildi.

Áskerge shaqyrylýshylardy áskerı bólimderge jóneltý aldynda mindetti túrde PTR ádisimen COVID-19-ǵa zerthanalyq zertteý júrgiziledi.

Bólimge kelgennen keıin jas tolyqtyrýshylar eki aptalyq karantınge ornalastyrylady, sondaı-aq medıtsınalyq tekserý júrgizilip, áskerge shaqyrylýshynyń áleýmettik psıhologııalyq mártebesi belgilenedi.

Qazaqstanda kúzgi shaqyrý 1 qyrkúıekte bastaldy. Áskerge shaqyrý naýqany jeltoqsannyń sońynda, áskerge shaqyrylýshylardyń sońǵy legi bólimge qyzmetke attanǵan kezde aıaqtalady.

Áskerge shaqyrý komıssııasynyń músheleri atap ótkendeı, sońǵy jyldary Qarýly Kúshterdiń, basqa da áskerler men áskerı quralymdardyń qataryn tolyqtyrýǵa nıet bildirýshiler sanynyń ósimi baıqalady. Kóptegen jastar qyzmetti paıdaly jáne qajet dep sanaıdy. Áskerde jarty jyl qyzmet etken, tehnıkalyq, kásiptik nemese joǵary bilimi bar jastar jaqsy nátıje kórsetip, kelisimshart boıynsha áskerı qyzmetke ornalasa alady.