Qarýly kúshterdiń tótenshe jaǵdaımen kúresi mınıstrdiń baqylaýynda

SEMEI. QazAqparat - General-polkovnık Rýslan Jaqsylyqov Qarýly kúshter bólimsheleriniń is-qımylyn jáne apat aımaǵynda basqa vedomstvolarmen ózara is-qımyldy uıymdastyrýdy jeke ózi úılestirýde, dep habarlaıdy QazAqparat.

Jaǵdaıdy zertteý, asa qaýipti aımaqtardy anyqtaý jáne órtke qarsy is-sharalardy odan ári josparlaý maqsatymen Qorǵanys mınıstri órt shalǵan aýmaqtyń ústimen ushyp ótti.

Tilsiz jaýdy aýyzdyqtaýǵa «Shyǵys» óńirlik qolbasshylyǵynyń 300-den astam áskerı qyzmetshisi jumyldyryldy, 30 birlik arnaıy áskerı tehnıka tartylǵan. Áskerı qyzmetshiler bóget salyp, aýmaqty jyrtyp jalyndy oqshaýlaý sharalaryn qabyldap jatyr. Armııalyq avıatsııa ekıpajdary tikushaqtarda 400 tonnadan astam sý tókti .

Borodýlıha aýdanyna jóneltýge daıyndyqta 500-den astam áskerı qyzmetshi jáne 30 birlik tehnıka daıyn tur. 200 adamnan turatyn qosymsha rezerv quryldy.

Órtke qarsy is-sharalarǵa tartylǵan áskerı qyzmetshiler aýysymmen jumys isteýde. Olar qajetti qorǵanys quraldarymen qamtamasyz etilgen. Ýaqtyly tamaqtanyp, demalýǵa bar jaǵdaı jasalǵan.

Qarýly kúshterdiń jeke quramy órttiń odan ári taralýyna jol bermeý úshin barlyq sharalardy qabyldaýda.