Qarýly kúshterdiń áskerı qyzmetshileri Abaı oblysyndaǵy órtti sóndirýge atsalysýda

ASTANA. QazAqparat - Óńirdegi órtke qarsy sharalarǵa «Shyǵys» óńirlik qolbasshylyǵynyń eki júzge jýyq áskerı qyzmetshisi men armııa avıatsııasynyń ekıpajdary jumyldyryldy, dep habarlaıdy QR Qorǵanys mınıstrliginiń baspasóz qyzmeti.

TJM jáne Qorǵanys mınıstrligi mamandarynyń jumyla kótergen is-áreketiniń arqasynda eldi mekenderge tóngen qaýip joıyldy, alaıda orman alqabynyń kúresi áli de jalǵasýda. Qazirgi ýaqytta órtke oranǵan orman aýdany 3500 gektardy qurap otyr.

– Búgin Astanadan kúshimizge qosymsha taǵy bir tikushaq keldi. Órt aýdanynda syıymdylyǵy 3,5 tonna «Bembı» aspaly sý aǵyzatyny bar úsh Mı-17 kóliktik-jaýyngerlik tikushaǵy tartyldy. Alty ekıpaj aýysymmen jumys isteýge jumyldyryldy, – dedi Semeı qalasy avıatsııalyq bóliminiń komandıri, birinshi synypty ushqysh polkovnık Azamat Bazylov.

Jumysty oryndaý barysynda armııa avıatsııasynyń ushqyshtary qyzyl jalynǵa qarsy jalpy kólemi 200 tonnaǵa jýyq sý shashqan.

Injenerlik bólimshelerdiń áskerı qyzmetshileri arnaıy tehnıkada órt sóndirý mashınalarynyń ótýi úshin jol salýda, jerdi jyrtyp, otqa tosqaýyl qoıýda. Odan bólek jeke quram qoldaǵy bar quraldardyń kómegimen órt sóndirýde. Qazirgi ýaqytta olar toǵyz sharshy shaqyrymnan asa orman alqabynyń órtin aýyzdyqtady.

Jedel shtabtyń basshylyǵymen jumystar táýlik boıy júrgiziletin bolady.