Qarýly kúshterdiń 2600-den asa sarbazy Otanǵa adal bolýǵa ant berdi

ASTANA. QazAqparat – «Ońtústik», «Shyǵys», «Astana» óńirlik qolbasshylyqtarynda, Áskerı-teńiz kúshterinde, sondaı-aq elordanyń desanttyq-shabýyldaý quramasynda ásker qataryn jańa tolyqtyrǵandardyń ant qabyldaý rásimderi ótti. Barlyǵy 2600-den astam sarbaz Otanǵa adal bolýǵa ant berdi. Bul týraly QazAqparat Qorǵanys mınıstrliginiń baspasóz qyzmetine silteme jasap habarlaıdy.

«Ońtústik» óńirlik qolbasshylyǵynda 1600-den astam sarbaz ant berdi. Saltanatty shara Tarazdaǵy «Jeńis» qalalyq saıabaǵynda ótti. Ásker qolbasshysy, general-maıor Mereke Kúshekbaev sarbazdardy osyndaı eleýli kúnmen quttyqtady.

«Baýyrjan Momyshuly atyndaǵy mehanıkalandyrylǵan quramanyń jaýyngerleri Jeńis saıabaǵynda, batyr eskertkishiniń janynda Otanyna adal bolýǵa ant berýi jaýyngerlik dástúrdiń jalǵasyp kele jatqanyn bildirse kerek. Otan aldyndaǵy qyzmetterińdi abyroımen atqarasyńdar dep senemin», - dedi general-maıor Mereke Kúshekbaev.

Aqtaýdyń áskerı-teńiz bazasynda da osyndaı saltanatty shara teńizshi jaýyngerlerdiń sapqa turýymen bastaldy. Pavlodar jáne Shyǵys Qazaqstan oblystarynan shaqyrylǵan matrostar bir aı ishinde teńizshilerdiń tirshiligin úırenip, kemedegi qyzmet negizderimen jáne teńiz termınologııasymen tanysyp úlgergen.

«Áskerge Pavlodar oblysynan keldim. Árıne, armııanyń ómir yrǵaǵy múlde bólek, bári kún tártibi jáne erejelerge sáıkes jasalady. Áskerı-teńiz kúshterine kelgenime qýandym. Teńizshi bolý – jaýapkershiligi mol jáne qyzyqty. Mundaǵy erekshe dástúrlerdi komandırler de tanystyryp jatyr», - dedi matros Aıaz Masyqbaev.

Kóptegen sarbazdardyń ata-analary men jaqyndary saltanatty ant qabyldaý rásimine qatysty. Keshe ǵana bozbala bop ketken balalarynyń kelbetinen eseıgenin baıqadyq dep aıtyp jatty.

«Búgin uldarymyz úshin mańyzdy kún. Ant berý sátin kórdik. Áskerdegi boryshyn óteý er azamattardy ózine degen senimdilikke tárbıeleıtin tamasha ómir mektebi bolary anyq», - dedi Pavlodardan elordadaǵy desanttyq-shabýyldaý quramasyna shaqyrylǵan Abzal Samattyń anasy Gúljanat Hamıtova.

Komandırler sharaǵa kelgen qonaqtardy sarbazdar qyzmet etetin jaǵdaımen tanystyryp, olardyń áskerı qyzmet tóńiregindegi suraqtaryna jaýap berdi.

Jalpy, daıyndyq kýrsynan keıin áskerı qyzmetshiler áskerı mamandyqtardy úırene bastaıdy. Olarǵa shtattyq qarý-jaraq pen áskerı tehnıka bekitiledi.

Foto: gov.kz