Qarýly Kúshterde arnaıy maqsattaǵy bólimshelerdiń oqý-jattyǵýy ótti - QR QM

ASTANA. QazAqparat - Qarashanyń 1-i men 3-i aralyǵynda «Shyǵys» óńirlik qolbasshylyǵynda arnaıy maqsattaǵy bólimshelermen taktıkalyq-arnaıy oqý-jattyǵý ótti.

Oqý-jattyǵýdyń  maqsatyna sáıkes óńirde sodyrlardy daıyndaý lageri, sondaı-aq, olarǵa qarýdy, oq-dárilerdi, azyq-túlik pen adamı resýrstardy jetkizip berý baǵdarlary aıqyndaldy, dep habarlaıdy QR QM baspasóz qyzmeti.

 

Daǵdarystyq ahýaldy joıý úshin arnaıy maqsattaǵy bólimsheler dabyl boıynsha kóterilip, jaýyngerlik qoldaný aýdanyna shyǵaryldy.

Artıllerııalyq bólimshelerdiń kúshimen tehnıka lekterin, qarý men oq-dárilerdi saqtaý qoımalaryn atyspen joıý uıymdastyryldy.

Qalǵan shartty sodyrlar qaraýsyz qalǵan ǵımaratta  qorshaýǵa alyndy. Kelissózder ótkizilip, qarýdy jınap tastaýdan bas tartqannan keıin zańsyz qarýly quralymdarǵa shabýyldaý toby shabýyl jasap, olardy  jaıratyp saldy.

 

«Atalǵan oqý-jattyǵý áskerı basqarý organdaryn praktıkalyq tapsyrmalardy sheshýge daıyndaýǵa, jeke quramdy basqarý boıynsha bólimshe komandırleriniń daǵdysyn jetildirýge, sonymen qatar, oqyp-úırenýshilerdiń myqty moraldyq-jaýyngerlik jáne psıhologııalyq qasıetterin qalyptastyrýǵa múmkindik beredi», - dep atap ótti bólimshe komandıri podpolkovnık Serik Ramazanov.